Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 85 Hüküm no: 45 Orijinal metin no: [28-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekib Bey’in vefatıyla küçük oğlu Hasan Bey’e intikal eden ev hissesinin satışına izin verilmesi Mehmed Necib, izin: 1 kıt‘a Numara: 243, 45 guruş Mahmiye-i İstanbul’da Yenibahçe kurbünde Defterdâr Ahmed Çelebi mahallesinde sâkin iken bundan akdem vefât eden Şekib Bey b. Hüseyin’in sulbî sagīr oğlu Hasan Bey’in min-kıbeli’l-eb ceddesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Hüsna Hanım bt. Mehmed m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme Saime Hatun Vakfı musakkafâtından mahalle-i mezkûrede Câmi‘-i şerîf sokağında on numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası sagīr-i mezbûrun bâ-sened-i hâkānî taht-ı tasarrufunda olup lâkin menzil-i mezkûr harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun aslâ mâlı olmayıp nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda [olan] nısf hisse-i şâyi‘asını bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin guruş bedel mukābelesinde âhara ferâğa izin taleb şüd. Fî 17 Za sene [1]300 Şühûdü’l-hâl: Muhzır Mehmed Ağa b. Mustafa, Muammer Salih Efendi b. Mehmed Râif ve gayruhum.