Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 85 Hüküm no: 46 Orijinal metin no: [28-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazganî Sadi Avarızı Vakfı ile Hâce Nefise Hatun Nukudu Vakfı kaymakamı Abdurrahman Nafiz Efendi’nin istifasıyla yerine Hüseyin Efendi’nin tayin edilmesi Hocazâde Ali Rıza, nasb-ı kāimmakām Numara: 214, 40 guruş Nezâret-i Evkāf-ı Hümâyûn’a mülhak evkāfdan mahmiye-i İstanbul’da Aksaray kurbünde Kazganî Sadi Mahallesi Avârızı Vakfıyla mahalle-i mezkûre câmi‘-i şerîfi ittisâlinde kâin çeşmenin ta‘mîrâtı içün merhûme Hâce Nefise Hatun Nukūdu Vakfı’nın bâ-hüccet-i şer‘iye kāimmakāmı Abdurrahman Nafiz Efendi bu def‘a kāimmakāmlık-ı mezkûrdan isti‘fâ etmekle yerine bir kāimmakām nasbı lâzım ve mühim olmağın emîn ve müstakīm ve her vechile kāimmakāmlık uhdesinden gelmeğe kādir idiği zeyl-i vesîkada muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan mahalle-i mezbûre imâmı işbu bâ‘isü’l-kitâb el-Hâc Hüseyin Efendi b. Ahmed vakfeyn-i mezkûreynin umûrlarını idâre ve rü’yete kıbel-i şer‘den kāimmakām nasb ü ta‘yîn olundukda ol dahi kabûl ve hizmet-i lâzımelerini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 11 Zilka‘de sene [1]300 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Kadri, Mahmud Efendi [b.] Ömer, Ahâlîden Salih Efendi b. Hüseyin ve gayruhum.