Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 86 Hüküm no: 47 Orijinal metin no: [28-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Mehmed Efendi’nin Mustafa Ağa Mescidi ve Zaviyesi Vakfı ile Hacı Mehmed İzari Vakfı’ndaki görevlerini yapmak üzere damadı Hafız Hüseyin Efendi’yi vekil tayin etmesi Salih, nasb-ı vekîl Numara: 249, 80 guruş Haremeyn-i Muhteremeyn’e tâbi‘ evkāfdan kasaba-i Tophâne’de Karabaş demekle meşhûr müteveffâ Mustafa Ağa Mescid-i şerîfi ve Zâviyesi Vakfı’nın yevmî beş akçe ile tevliyet ve nezâret-i Evkāf-ı Hümâyûn’a mülhak evkāfdan kasaba-i mezkûrede vâki‘ Evkāf-ı Hümâyûn kîsedârı müteveffâ Hacı Mehmed İzari? Vakfı’nın yevmî dörder akçeden cem‘an sekiz akçe vazîfe ile cibâyet cihetlerine üç kıt‘a berât-ı âlî ile mutasarrıf olan Karabaş Mustafa Ağa mahallesi imâmı Hafız Mehmed Efendi b. el-Hâc Mehmed Salih m. dâmâdı mahalle-i mezbûrede sâkin işbu bâ‘isü’l-kitâb Hafız Hüseyin Efendi b. el-Hâc Cemil mahzarında ikrâr-ı tam ve takrîr-i kelâm edüp ben müsin ve ihtiyâr olmamla mûmâ-ileyh Karabaş Mustafa Ağa Vakfı’nın sâl be-sâl muhâsebesini rü’yete ve musakkafât ve müstegallâtından vukū‘ bulan ferâğ ve intikālâtı istimâ‘ ve i‘tâ-i izne ve mahlûlâtı tâlibine îcâra ve nizâ‘ zuhûr eder ise husûmet ve terâfu‘a ve mûmâ-ileyh Mehmed İzari? Vakfı’nın cibâyet hizmetlerini dahi rü’yete tarafımdan dâmâdım mûmâ-ileyh Hafız Hüseyin Efendi’yi vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde [29] ol dahi vekâlet-i mezkûreyi kabûl ve hizmet-i lâzımelerini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 22 Za sene 1300 Şühûd[ü’l-hâl]: Berber Mustafa Ağa b. Ahmed, Tüfenkçi Mehmed Çavuş b. Mehmed, Ahâlîden asâkirden muhrec Mehmed Ağa b. Ahmed, Mehmed Fâris Bey, Bedirhan Bey, Kahveci Ali Efendi b. Mustafa, Zabtiyeden muhrec Yusuf Ağa b. Ahmed ve gayruhum.