Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 87 Hüküm no: 48 Orijinal metin no: [29-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Hasan Halefi Efendi’nin vefatıyla küçük oğlu Mahmud Celaleddin Molla’ya intikal eden ev hissesinin satışına izin verilmesi Mustafa Zühdü, izin: 1 kıt‘a Numara: 251, 233 guruş Medîne-i Üsküdar’a muzâfe İstavros karyesinde Fıstıklı nâm mahal ahâlisinden olup İstanbul’da Laleli kurbünde Kızıltaş mahallesinde sâkin iken bundan akdem vefât eden es-Seyyid eş-Şeyh Hasan Halefî Efendi b. el-Hâc Mahmud’un sulbî sagīr oğlu Mahmud Celaleddin Molla’nın üveyi vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isetü’l-kitâb Âişe Sıddıka Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme ve mağfûrun-lehâ Hâce Rukiye Hanım Vakfı musakkafâtından zikr olunan Fıstıklı nâm mahâlde kâin ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbiye kebîre kızı Saime Hanım’a hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misli[yle] ve bâ-re’y-i mütevellî âhara ferâğa ve bedeli ahz ü kabz ve müteveffâ-yı mezbûrun Mahkeme-i Teftîş Beytü’l-mâl Kassâmlığı cânibinden tahrîr olunan terekesi defter-i kassâmı zeyline idhâl birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında vücûhla enfa‘ ve evlâ olduğuna binâen işbu yedimde olup Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on beş bin beş yüz elli guruş mukābelesinde bâ-re’y-i mütevellî âhara ferâğa izin taleb şüd. Fî 21 Zilka‘de sene 1300 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Kadri, Münâdî Hacı Osman Efendi b. Osman ve gayruhum.