Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 88 Hüküm no: 49 Orijinal metin no: [29-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaltakçı Mustafa’nın vefatıyla küçük çocukları Ahmed Rıfat ve Hatice’ye intikal eden ev arsası hisselerinin satışına izin verilmesi İbrahim, izin: 1 kıt‘a Numara: 245, 15 guruş Mahmiye-i İstanbul’da Karagümrüğü kurbünde Debbâğzâde mahallesinde sâkin iken bundan akdem vefât eden Kaltakçı Mustafa Ağa b. Mustafa’nın sulbî sagīr oğlu Ahmed Rifat ve sulbiye sagīre kızı Hadice’nin vâlideleri ve tesviye-i emrlerine vasîyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm el-Hâc İskender Bey Vakfı musakkafâtından mahalle-i mezbûrede Yeniçeşme caddesinde yetmiş altı numara ile murakkam ma‘lûmü’l-hudûd yevmî iki akçe icâre-i müeccelelü bir kıt‘a menzil arsası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbî kebîr oğlu Hafız Mehmed Efendi ve sulbiye kebîre kızı Hürmüz Hanım’a hasbe’l-âde irbâ‘an ba‘de’l-intikāl bint-i kebîre-i mezbûre Hürmüz Hanım dahi mu‘ahharan bilâ-veled fevtiyle arsa-i mezkûrede olan rub‘ hisse-i şâyi‘ası mahlûl ve cânib-i vakfa âid ve râci‘ olup ve kebîr-i mezbûr Hafız Mehmed Efendi arsa-i mezkûrede olan rub‘ hisse-i şâyi‘asını âhara ferâğ edeceğinden sagīrân-ı mezbûrânın babaları müteveffâ-yı mezbûrdan [30] mevrûs mâlları kalîl olup nafaka ve kisveye dahi eşedd-i ihtiyâcı olmağla sagīrân-ı mezbûrânın arsa-i mezkûrede olan iki rub‘ hisse-i şâyi‘aları kebîr-i mezbûr Hafız Mehmed Efendi’nin hissesiyle ma‘an bedel-i misliyle âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın arsa-i mezkûrede olan iki rub‘ hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin guruş mukābelesinde bâ-re’y-i mütevellî âhara ferâğa izin taleb şüd. Fî 25 Za sene [1]300 Şühûdü’l-hâl: Benlizâde Mekteb Halîfesi es-Seyyid Mehmed Tevfik Efendi b. Mustafa, Doktorhâne ketebesinden Hafız İsmail Efendi b. Abdullah ve gayruhum. Derûn-ı hüccetde bast ü beyân olunduğu üzere vasîyy-i mezbûre Âişe Hanım sagīrân-ı mezbûrânın arsa-i mezkûrede olan iki rub‘ hisse-i şâyi‘alarını bedel-i misli idiği mütehakkık olan lira-yı Osmânî yüz guruş hesâbıyla bin guruş mukābelesinde Muhzır Osman Ağa b. Mustafa’ya ol dahi der-akab meblağ-ı merkūm mukābelesinde vasîyy-i mezbûre Âişe Hanım’a ba‘de’l-ferâğ vasîyy-i mezbûre Âişe Hanım sagīrân-ı mezbûrânın müşterek mallarından ve li-ecli’l-idâne vasî nasb olunan mezbûr Osman Ağa yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla bin guruş deyni mukābelesinde arsa-i mezkûrenin iki rub‘ hissesiyle ma‘an tefevvüz edeceği diğer rub‘ hisse ki cem‘an üç rub‘ hisse arsa-i mezkûru sagīrân-ı mezbûrâna vefâen ferâğ ve tefvîz edeceğinden ol-vechile ferâğları icrâ ve senedâtı i‘tâ olunmak üzere işbu mahalle şerh verildi.