Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 89 Hüküm no: 50 Orijinal metin no: [30-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Kostanti’nin ölümüyle küçük çocukları Vasil ve Aspasya’ya intikal eden ev ve dükkân hisselerinin satışına izin verilmesi Nazmi, izin: 1 kıt‘a Numara: 252, 38,5 guruş Mahmiye-i İstanbul’da Yedikulekapısı dâhilinde Kürkçübaşı Hacı Hüseyin Ağa mahallesinde sâkin iken bundan akdem fevt olan Devlet-i Aliyye teba‘asının Rum milletinden Yorgi v. el-müteveffâ Kostanti v. Angeli’nin sulbî sagīr oğlu Vasil ve sulbiye sagīre kızı Aspasya’nın anaları ve tesviye-i emirlerine bâ-hüccet-i şer‘iye vasîyy-i mansûbeleri şahsı ta‘rîf-i [şer‘î ile] mu‘arrefe işbu bâ‘isetü’l-vesîka Kiryakiçe Kadın bt. Dimitri m. bi’l-vesâye takrîr-i kelâm edüp nezâret-i Haremeyn-i Muhteremeyn’e mülhak evkāfdan Saray-ı atik başkapı gulâmı esbak merhûm Lala Tayfur Ağa Vakfı musakkafâtından mahalle-i mezbûrede Mûytâb sokağında kâin bir numara ile murakkam ma‘lûmü’l-hudûd ve’l-müştemilât bir bâb menzil ve tahtında Mirâhor caddesinde yüz altmış yedi numara ile murakkam bir bâb kahve dükkânından herbirinin nısf hisse-i şâyi‘aları babaları müteveffâ-yı merkūm Kostanti intikālinden müteveffâ-yı merkūm Yorgi ile li-ebeveyn karındaşları Anla ve Kartika’nın âdiyen bi’l-icâreteyn taht-ı tasarruflarında iken merkūm Yorgi’nin fevtiyle nısfdan sülüs hissesi sagīrân-ı merkūmâna hasbe’l-âde intikāl edüp lâkin menzil ve dükkân-ı mezkûrlar ânen fe-ânen müşrif-i harâb olarak hâsılı harcına vefâ etmeyip bekāları sagīrân-ı merkūmân haklarında muzır ve gayr-ı müfîd olduğundan mâ‘adâ sagīrân-ı merkūmânın nafaka ve kisveye eşedd-i ihtiyâçları olmağla sagīrân-ı merkūmânın nısfdan sülüs hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i [Belediye] taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın menzil ve dükkân-ı mezkûrlarda olan hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i [31] [misli] idiği bi’l-ihbâr zâhir olan lira-yı Osmânî yüz guruş hesâbıyla iki bin beş yüz seksen üç guruş mukābelesinde bâ-re’y-i mütevellî âhara ferâğa izin taleb şüd. Fî 29 Za sene [1]300 Şühûd[ü’l-hâl]: Mehmed Ağa b. Mehmed, Tosun Ağa b. Mehmed ve gayruhum.