Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 94 Hüküm no: 53 Orijinal metin no: [34-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Redif Taburu Kolağası Abdülaziz Efendi’ye ait ev hissesine el koyan Osman Fahri Efendi’den hissenin alınması Aşçızâde Mehmed, isbât-ı vekâlet: 1 kıt‘a Numara: 254, 40 guruş Mahmiye-i İstanbul’da Aksaray civârında Alembey mahallesi ahâlisinden olup Aydın vilâyet-i celîlesine mülhak medîne-i Manisa’da Câmi‘-i Kebîr mahallesinde sâkin redîf taburu sağkol ağası Abdülaziz Efendi b. el-müteveffâ İbrahim Edhem b. Abdullah’ın li-ümmi er karındaşı olup tarafından ber-vech-i âtî vekâlet iddi‘â eden işbu bâ‘isü’l-kitâb hakkāk esnâfından İhsan Efendi b. Azmi b. Abdurrahman m. zikri âtî menzil hissesine bi’l-emâne vaz‘-ı yedi mütehakkık olan Osman Fahri Efendi b. İbrahim mahzarında üzerine da‘vâ ve takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme Fatıma Hatun Vakfı musakkafâtından medîne-i Üsküdar’da Kassâm çeşmesi kurbünde Evliyâhoca mahallesinde kâin yirmi dört numara ile murakkam ma‘lûmü’l-hudûd ve’l-müştemilât beher şehr otuz akçe icâre-i müeccelelü bir bâb menzilin dört hisse i‘tibârıyla üç hissesi babası müteveffâ-yı mezbûr İbrahim Edhem intikālinden birâderim gāib-i mezbûrun bâ-temessük-i mütevellî bi’l-icâreteyn taht-ı tasarrufunda ve mezbûr Osman Fahri Efendi hisse-i mezkûreye birâderim gāib-i mezbûrun teslîmiyle bi’l-emâne vâzı‘ü’l-yed olup ancak birâderim gāib-i mezbûr ber-vech-i muharrer mutasarrıf olduğu hisse-i mezkûreyi merkūmun yedinden nez‘ ve kabz ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Muharremi’l-harâmının yirmi dokuzuncu günü târihi günü târihiyle müverraha medîne-i mezkûre nâibi sudûr-ı i‘zâmdan semâhatlü Haydar Efendi Hazretlerinin imzâ ve hâtemini hâviye bir kıt‘a vekâlet hücceti ve hüccet-i mezkûre zahrında muharrer vilâyet-i mezkûre Bidâyet Mahkemesi’nin memhûr mazbata mantûklarınca mahkeme-i mezbûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve vech-i lâyıkıyla bana teslîme mezbûr Osman Fahri Efendi dahi cevâbında hisse-i mezkûre nâib-i mezbûrun ber-vech-i muharrer intikālen bi’l-icâreteyn taht-ı tasarrufunda olup kendüsü dahi bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun ber-vech-i muharrer vekâlet müdde‘âsını inkâr etmekle hüccet ve mazbata-i mezkûreler lede’l-mütâla‘a hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğuna ve mazmûnu müdde‘î-i mezbûrun takrîr-i meşrûhuna mutâbık olduğuna ve mazbata-i mezkûre dahi hüccet-i mezkûreyi müeyyid ve musaddık bulunduğuna binâen tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i mezbûrun vekâletine ba‘de’l-hükm hisse-i mezkûreden keff-i yed ve müdde‘î vekîl-i mezbûr İhsan Efendi’ye teslîme mezbûr Osman Fahri Efendi’ye tenbîh olunmağın mâ-vaka‘a bi’t-taleb ketb olundu. Fî 29 Zilka‘de sene 1300 Şühûd[ü’l-hâl]: Ömer Ağa b. Kadri, Mehmed Ağa b. Mustafa ve gayruhum.