Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 95 Hüküm no: 54 Orijinal metin no: [34-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Hatice Hatun bt. İslam Vakfı mütevellisi olup gaibte olan Zeyneb Feride Hanım’ın görevinin Mustafa Hayreddin Efendi’ye verilmesi Salih, nasb-ı kāimmakām Numara: 266, 40 guruş Haremeyn-i Muhteremeyn’e tâbi‘ evkāfdan Eyüb’de Câmi‘-i Kebîr mahallesinde vâki‘ Hacce Hadice Hatun bt. İslâm Vakfı’nın sülüs hisse-i tevliyetine bâ-berât-ı âlî mutasarrıfa olan Zeyneb Feride Hanım iki yüz doksan altı senesi târihinden berü diyâr-ı âhara azîmetle el-yevm mahâll-i ikāmeti ve hayat ve memâtı nâ-ma‘lûm olarak gāibe ve mefkūde olduğundan mezbûre Zeyneb Feride Hanım’ın zuhûruna değin sülüs hisse-i tevliyet umûrunu idâre ve rü’yete bir kāimmakām nasbı lâzım ve mühim olmağın tevliyet-i mezkûrenin sülüsân hissesinin bâ-berât-ı âlî mutasarrıfı olup emîn ve müstakīm ve her vechile umûr-ı vakfı idâre ve rü’yete muktedir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan Eyüb Mahkeme-i Şer‘iyyesi mukayyidi işbu bâ‘isü’l-kitâb es-Seyyid Mustafa Hayreddin Efendi b. es-Seyyid Hafız Mehmed Sadeddin Efendi mütevelliye-i mezbûre Zeyneb Feride Hanım’ın zuhûruna değin sülüs hisse tevliyet umûrunu dahi idâre ve rü’yete kıbel-i şer‘den kāimmakām-ı mütevellî nasb ü ta‘yîn olundukda ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 4 Şevvâl sene 1300 Şühûd[ü’l-hâl]: İsmail Nuri Efendi b. Üveys, Vakf-ı mezbûrun câbîsi Ali Efendi b. Abdullah ve gayruhum.