Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 96 Hüküm no: 55 Orijinal metin no: [35-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerkük kasabasından Ali Rıza Bey’in vefatıyla küçük çocukları Hasan Haşim ve Edhem’e intikal eden ev arsası hisselerinin satışına izin verilmesi Sıddık, vekâlet Numara: 27, 62,5 guruş Bağdâd vilâyetinde Kerkük kasabasında sâkin iken bundan akdem vefât eden asâkir-i şâhâne kāimmakāmlarından Ali Rıza Bey b. el-merhûm es-Seyyid İbrahim b. Hasan’ın sulbî sagīr oğulları Hasan Haşim ve Edhem’in vâlideleri ve bâ-hüccet-i şer‘iye vasîyy-i mansûbeleri olup Şâm-ı şerîfde sâkine Emine Hanım bt. Hurşid b. Abdullah tarafından ber-vech-i âtî vekâlet iddi‘â eden Üsküdar Rüsûmât müdîri sâbık müteveffâ Edhem Efendi mahdûmu Rıza Bey m. zikri âtî arsa hissesine bi’l-emâne vâzı‘ü’l-yed olan Mehmed Şükrü Efendi b. Ali mahzarında üzerine da‘vâ ve takrîr-i kelâm edüp nezâret-i Haremeyn-i Muhteremeyn’e mülhak evkāfdan merhûm Tezkireci Hüseyin Efendi Vakfı müstegallâtından mahmiye-i İstanbul’da Çakırağa mahallesinde vâki‘ ma‘lûmü’l-hudûd şehriye kırk beş akçe icâre-i müeccelelü bir kıt‘a menzil arsasının nısf hissesi babası müteveffâ-yı mezbûr İbrahim Ağa intikālinden müteveffâ-yı mezbûr Ali Rıza Bey’in hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı mezbûrûn ile sulbî kebîr oğlu Hüsnü Efendi’ye irbâ‘an intikāl edüp ol-vechile arsa-i mezkûrenin nısfından üç rub‘ hisse-i şâyi‘aları sıgār-ı mezbûrûnun tasarruflarında ve mezbûr Mehmed Şükrü Efendi hisse-i mezkûreye vasiyye-i gāibe-i mezbûrenin teslîmiyle bi’l-emâne vâzı‘ü’l-yed olup lâkin arsa-i mezkûre bî-hâsıl olarak bekāsı sıgār-ı mezbûrûn haklarında gayr-ı nâfi‘ olduğundan mâ‘adâ sıgār-ı mezbûrûnun nafaka ve kisveye eşedd-i ihtiyâçları olmağla sıgār-ı mezbûrûnun arsa-i mezkûrede olan nısfdan üç rub‘ hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı mezbûrûn haklarında her vechile enfa‘ ve evlâ olduğuna binâen vasiyye-i gāibe-i mezbûre Emine Hanım sıgār-ı mezbûrûnun hisse-i şâyi‘a-i mezkûrelerini mezbûrun yedinden nez‘ ve kabza ve ba‘de’l-kabz âhara ferâğa kıbel-i şer‘den izin talebine ve ba‘de’l-izn bedel-i misliyle bâ-re’y-i [mütevellî] âhara ferâğa ve bedelini ahz ü kabz ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke şehr-i Rebî‘ülâhir’inin on birinci günü târihiyle müverraha Dımeşkü’ş-şam nâibi fazîletlü Mustafa Hakkı Efendi’nin imzâ ve hâtemini hâviye bir kıt‘a vekâlet hücceti ve zahrında muharrer Suriye Vilâyeti İstînâf Mahkemesi’nin memhûr mazbatası mûceblerince mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb u ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve bana teslîme mezbûr Mehmed Şükrü Efendi’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûre ber-vech-i muharrer intikāl-i âdîye binâen sıgār-ı mezbûrûnun tasarruflarında olup kendüsü dahi hisse-i mezkûreye vasiyye-i gāibe-i mezbûrenin teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i mezbûrûnun vekâlet müdde‘âsını ba‘de’l-inkâr hüccet ve mazbata-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâne-i celîleden hâmişine tahşiye ve temhîr kılındığına ve mazmûnu müdde‘î vekîl-i mezbûrun takrîr-i meşrûhuna muvâfık olduğuna ve mazbata-i mezkûre dahi hüccet-i mezkûrenin mazmûnunu müeyyid ve musaddık bulunduğuna binâen tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu misillü tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i mezbûrun vekâletine ba‘de’l-hükm ve’t-tenbîh Birinci Dâire-i Belediye ser-mühendisliği tarafından i‘tâ kılınan memhûr bir kıt‘a tahmîn-i bedel pusulası mantûkunca sıgār-ı mezbûrûnun hisse-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde bâ-re’y-i mütevellî âhara ferâğa kıbel-i şer‘den müvekkilesi vasiyye-i gāibe-i mezbûre Emine Hanım’a izâfetle vekîl-i mezbûr Rıza Bey’e izin verilmeğin mâ-vaka‘a bi’t-taleb ketb olundu. Fî 17 Şa‘bân sene 1300 Şühûdü’l-hâl: Muhzırbaşı Ömer Ağa b. Kadri, Mehmed Ağa b. Mustafa ve gayruhum.