Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 98 Hüküm no: 56 Orijinal metin no: [36-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lökye bt. Angel’in ölümüyle küçük çocuklarına intikal eden bağ hisselerinin satışına izin verilmesi Mehmed Necib, izin: 2 kıt‘a Numara: 269, 159 guruş Kartal kazâsına tâbi‘ Ada-i Kebîr’de sâkine iken bundan akdem fevt olan teba‘a-i Devlet-i Aliyye’nin Rum milleti nisvânından Lökye? bt. el-müteveffâ Angel v. Lambo’nun sadrî sagīr oğlu Panko ve sadriye sagīre kızı Oyanya’nın babaları ve velîleri olup mu‘temedü’l-hâl idiği ihbâr olunan işbu bâ‘isü’r-rakīm Kostaki v. Yuvan m. bi’l-velâye takrîr-i kelâm edüp Evkāf-ı Hümâyûn Hazînesi’nden mazbût evkāfdan Bezm-i Âlem Vâlide Sultan -tâbet serâhâ- Hazretleri Evkāf-ı şerîfeleri müstegallâtından kazâ-i Erba‘a sancağında Çekmece-i Sagīr kazâsında Bağlar mevki‘inde vâki‘ otuz yedi numara ile murakkam ma‘lûmü’l-hudûd senevî yüz elli guruş icâre-i müeccelelü bir kıt‘a bağ müteveffât-ı merkūmenin hayatında bâ-sened-i hâkānî taht-ı tasarrufunda olup ba‘de vefâtihâ sagīrân-ı merkūmân ile sadrî kebîr oğulları Haralambos ve Dimitri ve sadriye kebîre kızı Eleni’ye hasbe’l-âde ihmâsen intikāl edüp lâkin bağ-ı mezkûrun kürûm ve eşcârı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīrân-ı merkūmân haklarında muzır ve gayr-ı müfîd olduğundan mâ‘adâ sagīrân-ı merkūmânın anaları müteveffât-ı merkūmeden mevrûs mâlları olmayıp ben dahi mu‘sir olarak infâka iktidârım olmadığından sagīrân-ı merkūmânın bağ-ı mezkûrda olan iki humus hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın bağ-ı mezkûrda olan iki humus hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bin altı yüz guruş mukābelesinde bâ-re’y-i mütevellî âhara ferâğa izin taleb şüd. Fî 4 Zilhicce sene 1300 Şühûd[ü’l-hâl]: Tosun Ağa b. Mehmed, Mehmed Ağa b. el-Hâc Hasan ve gayruhum.