Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 98 Hüküm no: 57 Orijinal metin no: [36-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lökye bt. Angel’in ölümüyle küçük çocuklarına intikal eden dükkân gediği hisselerinin satışına izin verilmesi Mehmed Necib, izin Numara: 257, 9 guruş Kartal kazâsına tâbi‘ Ada-i Kebîr’de sâkine iken bundan akdem fevt olan Rum milleti nisvânından Lökye? bt. el-müteveffâ Angel v. Lambo’nun sadrî sagīr oğlu Panko ve sadriye sagīre kızı Oyanya’nın babaları ve velîleri mu‘temedü’l-hâl idiği ihbâr olunan işbu bâ‘isü’s-sifr Kostaki v. Yuvan m. bi’l-velâye takrîr-i kelâm edüp Yedikule hâricinde Fatih Sultan Mehmed Han mahallesinde Timurhan caddesinde vâki‘ kırk dört numara ile murakkam ma‘lûmü’l-hudûd bir bâb berber dükkânı derûnunda mevcûde berber gediği ta‘bîr olunur yevmî iki akçe icâre-i müeccelelü âlât-ı lâzıme-i ma‘lûme müteveffiye-i mezbûrenin babası müteveffâ-yı merkūm Angel’in hayatında tasarrufunda olduğu hâlde sulbî kebîr oğlu Sarrâf Dimitraki ve sulbiye kebîre kızları Ezmerağda ve Lökye’yi? terk ederek fevt olup lâkin merkūm Sarrâf Dimitraki Rusya Devleti teba‘asından olduğu millet-i merkūme patrikhânesi tarafından memhûren verilen bir kıt‘a ilmühaberden zâhir ve ol-vechile hakk-ı intikālinden mahrûm olmağla âlât-ı gedik-i mezkûr ancak merkūmetân Ezmerağda ve Lökye’ye? münâsafeten ba‘de’l-intikāl merkūme Lökye’nin? dahi mu‘ahharan fevtiyle gedik-i mezkûrda olan nısf hisse-i şâyi‘ası sagīretân-ı merkūmetân ile sadrî kebîr oğulları Haralambos ve Dimitri ve sadriye kebîre kızı Eleni’ye ihmâsen intikāl edüp lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olduğundan mâ‘adâ sagīrân-ı merkūmânın anaları müteveffiye-i merkūmeden mevrûs mâlları olmayıp ben dahi mu‘sir ve infâka adîmü’l-iktidâr olduğumdan sagīretân-ı merkūmetânın âlât-ı gedik-i mezkûrda olan nısfdan iki humus hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi tarafından i‘tâ olunan memhûr bir kıt‘a ilmühaber mantûkunca sagīrân-ı merkūmânın gedik-i mezkûrda olan [37] iki humus hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı yüz guruş mukābelesinde bâ-re’y-i mütevellî âhara ferâğa izin taleb şüd. Fî-selhi Zilka‘de sene 1300 Şühûd[ü’l-hâl]: Mehmed Ağa b. Mustafa, Mehmed Ağa b. Osman ve gayruhum.