Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 99 Hüküm no: 58 Orijinal metin no: [37-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şami bt. Asador’un küçük oğlu Mardıros’un rüşdünü ispat etmesi Salih, isbât-ı rüşd Mahmiye-i İstanbul’da Langa Yenikapısı hâricinde Kâtib Kasım mahallesinde sâkine iken bundan akdem fevt olan Devlet-i Aliyye teba‘asının Ermeni milleti nisvânından Şami bt. Asador’un sadrî oğlu olup Kumkapı Ermeni Milleti Patrikhânesi tarafından verilen memhûr bir kıt‘a ilmühaber mûcebince yirmi yaşını mütecâviz ve bulûğunu mukırr u mu‘terif olarak ber-vech-i âtî rüşdünü iddi‘â eden teba‘a ve millet-i merkūmeden kunduracı esnâfından işbu hâmilü’r-rakīm Mardıros v. Merkeryos m. merkūmun kıbel-i şer‘den mansûb vasîsi olup zikri âtî mâlına vâzı‘ü’l-yed olan teba‘a ve millet-i merkūmeden Sucu İstefan v. Begos muvâcehesinde üzerine da‘vâ ve takrîr-i kelâm edüp hâlâ ben yirmi yaşımı mütecâvize âkıl ve bâliğ ve rüşdüm bulûğuma munzam olarak umûrumu bi’n-nefs rü’yete kādir ve i‘âne-i vasîden müstağnî olmamla vâlidem müteveffât-ı merkūmeden mevrûs mâlımı taleb ederim dedikde gıbbe’s-suâl vasîyy-i merkūm İstefan cevâbında müdde‘î-i merkūmun mâlına bi’l-vesâye vaz‘-ı yedini tâyi‘an ikrâr mâ‘adâ müdde‘î-i merkūmun ber-vech-i meşrûh rüşd müdde‘âsını inkâr edicek, müdde‘î-i merkūmdan ber-vech-i muharrer müdde‘âsına mutâbık beyyine taleb olundukda ahrâr-ı ricâl-i gayr-ı Müslimînden mahalle-i mezbûrede sâkin teba‘a ve millet-i merkūmeden Dürzi Kalost v. Artin ve Gedikpaşa’da Sarayiçi nâm mahâlde sâkin teba‘a ve millet-i merkūmeden Yazıcı Ohannes v. Balbalyan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i merkūm Mardıros hâlâ yirmi yaşını mütecâviz olarak âkıl ve bâliğ ve rüşdü bulûğuna munzam olarak umûrunu bi’n-nefs rü’yete kādir ve i‘âne-i vasîden müstağnîdir, biz bu husûsa bu vech üzere şâhidiz, şehâdet dahi ederiz deyü herbiri müttefikü’l-lafz ve’l-ma‘nâ bi’l-muvâcehe edâ-yı şehâdet-i şer‘iye etdiklerinde şâhidân-ı merkūmân zikr olunan Yenikapı Ermeniyân milleti muhtârı Mıgırdıç v. Refagi ve Gedikpaşa’da Ermeniyân muhtârı Osip v. Bağsun evvelâ bâ-varaka-i mestûre sırran ve ba‘dehû ketebeden Ârif Efendi b. Ahmed ve Yazıcı Ali Efendi b. Abdullah ve Varakay Begos v. Mıgırdıç ve Manas v. İstefan’dan alenen lede’t-tezkiye adl ve makbûlü’ş-şehâde idikleri zîr-i varakayı tahrîr ve ihbâr olunmağın mûcebince ba‘de’l-hükm anası müteveffât-ı merkūmeden mevrûs mâlını müdde‘î-i merkūma teslîme merkūm İstefan’a tenbîh eylediğini Evkāf-ı Hümâyûn Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 8 Zilka‘de sene 1300 Şühûd[ü’l-hâl]: ( )