Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 100 Hüküm no: 59 Orijinal metin no: [38-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ferid Efendi’nin küçük oğlu Hüseyin Nesib’in rüşdünü ispat etmesi Mustafa Zühdü, isbât-ı rüşd Numara: ( ), bilâ-harc Hazret-i Ebî Eyyûb el-Ensârî -radiye anhu rabbihi’l-bârî- Evkāf-ı şerîfeleri hudûdu dâhilinde medîne-i müşârün-ileyhâ mahallâtından Câmi‘-i Kebîr mahallesinde sâkin iken bundan akdem vefât eden Osman Ferid Efendi b. Hasan’ın sulbî oğlu olup İstanbul’da Eğrikapı civârında Avcıbey mahallesi imâm ve muhtârânının i‘tâ eyledikleri bir kıt‘a ilmühaber mûcebince el-yevm yirmi yaşını mütecâviz ve bulûğunu mukırr ve mu‘terif olarak ber-vech-i âtî rüşdünü iddi‘â eden işbu bâ‘isü’l-kitâb Hüseyin Nesib Efendi m. vâlidesi ve bâ-hüccet-i şer‘iye vasîyy-i mansûbesi olup zikri âtî mâlına vâzı‘atü’l-yed olan zâtı ta‘rîf-i şer‘î ile mu‘arrefe olan Fâtımatü’z-zehra Hanım bt. İbrahim mahzarında üzerine da‘vâ ve takrîr-i kelâm edüp ben el-yevm yirmi yaşımı mütecâviz olarak âkıl ve bâliğ ve rüşdüm bulûğuma munzam olup umûrumu bi’n-nefs rü’yete kādir ve i‘âne-i vasîden müstağnî olmamla babam müteveffâ-yı mezbûrdan mevrûs ber-vech-i defter-i kassâm mâlım olup vâlidem vasîyy-i mezbûrenin vâzı‘atü’l-yed olduğu mâlımı hâlâ taleb ederim dedikde gıbbe’s-suâl vasîyy-i mezbûre dahi cevâbında müdde‘î-i mezbûr Hüseyin Nesib Efendi’nin babası müteveffâ-yı mezbûrdan mevrûs mâlına bi’l-vesâye vâzı‘ü’l-yed olduğunu ikrâr mâ‘adâ ber-vech-i muharrer rüşd müdde‘âsını inkâr edicek, müdde‘î-i mezbûrdan ber-vech-i muharrer müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden Eğrikapı civârında Avcı Bey mahallesinde sâkin el-Hâc Hasan Efendi b. Mehmed b. Ali ve Ali Ağa b. Süleyman b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr Hüseyin Nesib Efendi el-yevm yirmi yaşını mütecâviz âkıl ve bâliğ ve rüşdü bulûğuna munzam olup umûrunu bi’n-nefs rü’yete kādir ve i‘âne-i vasîden müstağnîdir, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iye etmeleriyle şâhidân-ı mezbûrân ketebeden Ali Efendi b. Ahmed b. Abdullah ve Kahveci Mehmed Ağa b. Mustafa b. Hasan ve Şişeci Mustafa Ağa b. Hasan b. Mehmed’den evvelâ bâ-varaka-i mestûre sırran ve ba‘dehû alenen lede’t-tezkiye adl ve makbûlü’ş-şehâde idikleri zîr-i varakaya tahrîr ve ihbâr olunmağın mûcebince ba‘de’l-hükm babası müteveffâ-yı mezbûrdan mevrûs mâlını mezbûr Hüseyin Nesib Efendi’ye teslîme vasîyy-i mezbûre Fâtımatü’z-zehra Hanım’a tenbîh eylediğini Evkāf-ı Hümâyûn kassâmı fazîletlü efendi hazretleri inhâ etmeğin mâ-vaka‘a bi’t-taleb ketb olundu. Fî 7 Zilhicce sene 1300 Şühûd[ü’l-hâl]: Muhzır Mehmed Ağa b. Mustafa, Muhzır Ömer Ağa b. Kadri ve gayruhum.