Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 101 Hüküm no: 60 Orijinal metin no: [38-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Hüseyin’in vefatıyla küçük kızı Vasfiye Kezban’a intikal eden arsa hissesinin satışına izin verilmesi Aziz Efendi, izin: 2 kıt‘a Numara: 16, 76,5 guruş Medîne-i Hazret-i Ebî Eyyûb el-Ensârî -radiye anhü’l-bârî- mahallâtından Şah Sultan mahallesinde sâkin iken bundan akdem vefât eden el-Hâc Mustafa Ağa b. Hüseyin’in sulbiye sagīre kızı Vasfiye Kezban’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Serfiraz Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Galata’da Kulekapısı’nda Müeyyedzâde Câmi‘-i şerîfinde müezzin olanlara meşrûta merhûme Selime Hatun Vakfı müstegallâtından câmi‘-i şerîf-i mezkûr mahallesinde Hendek caddesinde vâki‘ ma‘lûmü’l-hudûd iki numara ile murakkam şehriye doksan akçe icâre-i müeccelelü müfrez bir kıt‘a arsanın sülüs hisse-i şâyi‘ası sagīre-i mezbûrenin bâ-sened-i hâkānî bi’l-icâreteyn taht-ı tasarrufunda olup lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye eşedd-i ihtiyâcı olmağla sagīre-i mezbûrenin arsa-i mezkûrede olan sülüs hisse-i şâyi‘ası bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Dâire-i Sâdise taraflarından i‘tâ olunan memhûr bir kıt‘a tahmîn-i bedel pusulası mantûkunca hisse-i mezkûre bundan akdem lede’l-müzâyede ve ba‘de’l-keşf el-yevm bedel-i misli [39] idiği bi’l-ihbâr zâhir olan sîm mecîdiye yirmi guruş hesâbıyla beş bin yüz otuz altı guruş yirmi altı para bedel mukābelesinde âhara ferâğa izin taleb şüd. Fî 27 Şevvâl sene 1300