Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 102 Hüküm no: 61 Orijinal metin no: [39-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatü’z-zehra Hanım’ın vefatıyla küçük oğlu Mustafa Niyazi Bey’e intikal eden arsa hissesinin satışına izin verilmesi Aziz, izin Numara: 161, 38,5 guruş Medîne-i Hazret-i Ebî Eyyûb el-Ensârî -radiye anhü’l-bârî- mahallâtından Şah Sultan mahallesinde sâkine iken bundan akdem vefât eden Fâtımatü’z-zehra Hanım bt. Abdullah’ın sadrî sagīr oğlu Mustafa Niyazi Bey’in babası ve velîsi olup mu‘temedü’l-hâl idiği bi’l-ihbâr zâhir olup diğer sadrî sagīr oğlu Osman Bey b. el-müteveffâ Nedim Bey’in dahi üveyi pederi ve tesviye-i umûruna bâ-hüccet-i şer‘iye vasîyy-i mansûbu olan işbu bâ‘isü’l-kitâb Ali Bey b. el-Hâc Mustafa m. bi’l-velâye ve bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Müeyyedzâde Câmi‘-i şerîfinde müezzin olanlara meşrûta merhûme Selime Hanım Vakfı müstegallâtından Galata’da Kulekapısı’nda câmi‘-i şerîf-i mezkûr mahallesinde Hendek caddesinde vâki‘ ma‘lûmü’l-hudûd iki numara ile murakkam şehriye doksan akçe icâre-i müeccelelü bir kıt‘a müfrez arsanın südüs hisse-i şâyi‘ası müteveffiye-i mezbûrenin hayatında bâ-temessük-i mütevellî bi’l-icâreteyn taht-ı tasarrufunda olunp ba‘de vefâtihâ sagīrân-ı mûmâ-ileyhimâya hasbe’l-âde münâsafeten intikāl edüp lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olduğu zâhir ve bedîdâr olup ol-vechile bekāsı sagīrân-ı mûmâ-ileyhimâ haklarında muzır ve gayr-ı müfîd olduğundan mâ‘adâ sagīrân-ı mûmâ-ileyhimânın nafaka ve kisveye dahi eşedd-i ihtiyâçları olmağla sagīrân-ı mûmâ-ileyhimânın arsa-i mezkûrede olan südüs hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olu[nu]p hâsıl olan nemâsıyla infâk ve iksâ olunmak sagīrân-ı mûmâ-ileyhimâ haklarında her vechile enfa‘ ve evlâ olduğuna binâen işbu yedimde olup hâlâ medîne-i mezkûre kādısı fazîletlü Hüseyin Neşet Efendi Hazretleri ile Dâire-i Sâdise taraflarından i‘tâ olunan memhûr bir kıt‘a tahmîn-i bedel pusulası mantûkunca hisse-i mezkûre bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan sîm yirmilik mecîdiye yirmi guruş hesâbıyla iki bin beş yüz altmış sekiz guruş yirmi yedi para bedel mukābelesinde âhara ferâğa izin taleb şüd. Fî 27 Şevvâl sene 1300 Şühûd[ü’l-hâl]: el-Hâc Nuri Ağa b. Veysel, Mehmed Emin Ağa b. Mustafa ve gayruhum.