Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 103 Hüküm no: 62 Orijinal metin no: [39-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vartan v. Artin’in ölümüyle vârislerinin Begos v. Artin’deki alacağını tahsil etmek istemeleri Hacı Hüsnü, isbât-ı vekâlet Numara: 54, 40 guruş Bitlis vilâyeti dâhilinde Karçıkan kazâsı kurâsından Kurt karyesinde sâkinler herbiri teba‘a-i Devlet-i Aliyye’nin Ermeni milletinden Artin v. Mardıros ve zevcesi teba‘a ve millet-i merkūme nisvânından Neso bt. Esbito v. Atam ve gelinleri teba‘a ve millet-i merkūme nisvânından Güzel bt. Ohannes v. Atam ve merkūme Güzel’in sadrî oğlu teba‘a ve millet-i merkūmeden Artin ve sadriye kızı teba‘a ve millet-i merkūme nisvânından Naneki v. Vartan v. Artin v. Atam taraflarından zikri âtî müteveffâya verâset ve vekâlet iddi‘â eden kezâlik teba‘a ve millet-i merkūmeden Bakkāloğlu Kigork v. Ohannes m. müteveffâ-yı merkūma on guruş medyûn olan kezâlik teba‘a ve millet-i merkūmeden Begos v. Artin muvâcehesinde üzerine da‘vâ ve takrîr-i kelâm edüp karye-i mezkûre ahâlisinden olup Galata’da Beyoğlu civârında Çöplük nâm mahâlde fevt olan teba‘a ve millet-i merkūmeden Vartan v. Artin v. Atam’ın gāibûn-ı merkūmûndan Artin’in firâşından ve zevcesi gāibe-i merkūme Neso’dan mütevellid sulbî ve sadrî oğulları ve gāibe-i merkūme Güzel dahi müteveffât-ı merkūmenin metrûkesi ve gāibân-ı merkūmân Artin ve Naneki dahi müteveffâ-yı merkūmun firâşından hâsıl ve zevcesi gāibe-i merkūmeden mütevellidler sulbî ve sadrî oğlu ve kızı olup ol-vechile müteveffâ-yı merkūmun verâseti zevcesi gāibe-i merkūme Güzel ile ebeveyni gāibân-ı merkūmân Neso ve Artin ve oğlu gāib-i merkūm Artin ve kızı gāibe-i merkūmeye munhasıra ve müteveffâ-yı merkūmun merkūm Begos zimmetinde cihet-i karz-ı şer‘îden on guruş alacak hakkı olmağla verese-i gāibûn-ı merkūmûndan herbiri meblağ-ı mezkûru merkūmdan ve müteveffâ-yı merkūmun hîn-i vefâtında indinde mevcûd olan terekesini vâzı‘ü’l-yed olanlardan ve zimem-i nâsda olan hukūkunu ashâbından taleb ve da‘vâ ve ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup bin üç yüz senesi Cemâziyelâhire’sinin yirmi beşinci günü târihiyle müverraha Bitlis kazâsı nâibi mekremetlü Hafız Mustafa Efendi’nin imzâ ve mutâbık hâtemini hâviye bir kıt‘a vekâlet hücceti nâtıka olduğu kazâ-i mezkûr mahkemesinde nâib-i mûmâ-ileyh [40] huzûrunda şühûd muvâcehesinde taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb u ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup meblağ-ı mezkûr on guruşu verese-i gāibûn-ı merkūmûn için bana edâya merkūm Begos’a tenbîh olunmak bi’l-vekâle murâdımdır deyü hüccet-i mezkûreyi ibrâz ile duhûl etdikde ol dahi cevâbında meblağ-ı mezkûr on guruş zimmetinde müteveffâ-yı merkūma deyni olduğunu tav‘an ikrâr ve i‘tirâf edüp lâkin müdde‘î vekîl-i merkūmun ber-vech-i muharrer verâset ve vekâlet müdde‘âsını inkâr edicek, müdde‘î-i merkūmdan ber-vech-i muharrer verâset ve vekâlet müdde‘âlarına mutâbık beyyine taleb olundukda udûl-ı ahrâr-ı ricâl-i Nasârâdan ve kazâ-i mezkûre ahâlisinden olup bu esnâda Der-aliyye’ye gelen teba‘a-i Devlet-i Aliyye’den ve millet-i merkūmeden Avadis v. Manuk ve Kirkor v. Parsih nâm kimesneler li-ecli’ş-şehâde meclis-i şer‘a hâzırân olup isre’l-istişhâd herbiri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı merkūmân İdâre-i Damga ve Matbû‘ât Rüsûm-ı Sitte Müdîri Ferid Efendi b. Nazif ve Yemiş İskelesi hamam esnâfı kethudâsı Şaban Ağa b. Süleyman’dan evvelâ bâ-varaka-i mestûre sırran lede’t-tezkiye adl ve makbûlü’ş-şehâde idiklerini mübeyyin müzekkiyân-ı merkūmân zîr-i varakayı ba‘de’t-temhîr alenen dahi hamal esnâfından Ali Ağa b. Mustafa ve Kîsedâroğlu Ali Ağa b. Ali ve Hamal Ohannes v. Gabriyel ve tüccârdan Kırkcan ve tüccârdan Vartan v. Gabriyel’den tezkiye olundukda şehâdetleri makbûle olduğu ihbâr olunmağın mûcebince verâset ve vekâlet-i mezkûrelere ba‘de’l-hükm meblağ-ı mezkûr on guruşu verese-i gāibûn-ı merkūmûn içün vekîl-i merkūm Kigork’a edâya merkūm Begos’a tenbîh olunduğunu Mahkeme-i Teftîş Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 5 Zilka‘de sene [1]300 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.