Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 105 Hüküm no: 63 Orijinal metin no: [40-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katrine bt. Pandeli’nin ölümüyle vârislerine intikal eden bogasici dükkânı gediğinden küçük çocuklarına düşen hisselerin satılmasına izin verilmesi Tevfik, izinli vekâlet Numara: 76, 72,5 guruş Medîne-i Isparta mahallâtından Emre mahallesinde sâkine iken bundan akdem vefât eden teba‘a-i Devlet-i Aliyye’nin Rum milleti nisvânından Katrine bt. el-müteveffâ Pandeli v. İvaz’ın sadrî sagīr oğulları Mina ve Kozima ve Andon evlâdı el-müteveffâ Petro’nun li-ebeveyn hâleleri ve tesviye-i emirlerine bâ-hüccet-i şer‘iye vasîyy-i mansûbları mahalle-i mezkûrede sâkin teba‘a-i merkūmeden İvaz ile merkūm İvaz’ın li-ebeveyn kız karındaşları kezâlik mahalle-i mezkûrede sâkineler teba‘a-i merkūme nisvânından Despina ve Gustov? ve Dilhem’in? li-ebeveyn karındaşları olup taraflarından ber-vech-i âtî vekâlet iddi‘â eden teba‘a-i merkūmeden bâ‘isü’l-kitâb Atnaş m. zikri âtî bogasici dükkânı gediğine bi’l-emâne vâzı‘ü’l-yed olan kezâlik teba‘a ve millet-i merkūmeden Haci Sava v. Mihail muvâcehesinde üzerine da‘vâ ve takrîr-i kelâm edüp mahmiye-i İstanbul’da Çarşı-yı Kebîr’de Yolgeçen Hanı civârında Kumaşçı Küçükoğlu Dülbendçi Tatos dükkânları beynlerinde kâin kırk yedi numara ile murakkam bir bâb bogasici dükkânı derûnunda mevcûde Hudâvendigâr-ı esbak cennet-mekân Gāzi Sultan Mahmud Hân-ı sânî -tâbe serâhû- Hazretleri Evkāf-ı celîleleri müstegallâtından gedik ta‘bîr olunur âlât-ı lâzıme-i ma‘lûmenin altmış dört sehm i‘tibârıyla şehriye yetmiş dokuz akçe icâre-i müeccelelü yirmi sekiz sehm hisse-i şâyi‘ası babam müteveffâ-yı merkūm Pandeli intikālinden benimle karındaşlarım gāibûn-ı merkūmûn ile sağlığında müteveffât-ı merkūme Katrine’nin âdiyen bi’l-icâreteyn taht-ı tasarrufumuzda iken kız karındaşım merkūme Katrine’nin fevtiyle âlât-ı gedik-i mezkûrda olan südüs hissesi oğulları sıgār-ı merkūmûna hasbe’l-âde intikāl edüp ve merkūm Haci Sava hisse-i merkūmeye babam müteveffâ-yı merkūmun sağlığında teslîmiyle bi’l-emâne vâzı‘ü’l-yed olup ancak benimle karındaşlarım gāibûn-ı merkūmûndan herbirimiz âlât-ı gedik-i mezkûrda olan hisselerini âhara ferâğ murâd edüp sıgār-ı merkūmûnun hisseleri kalîl olarak uhdelerinde ibkāsıyla intifâ‘ mümkün olmamağla sıgār-ı merkūmûnun hisseleri dahi benimle karındaşlarım gāibûn-ı merkūmûnun hisseleriyle ma‘an bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunmak sıgār-ı merkūmûn haklarında her vechile enfa‘ ve evlâ olduğuna binâen yirmi sekiz sehm âlât-ı gedik-i mezkûrdan sıgār-ı merkūmûnun hisselerini bedel-i misliyle bâ-re’y-i mütevellî âhara ferâğa kıbel-i şer‘den izin talebine ve ba‘de’l-izn karındaşlarım gāibûn-ı merkūmûnun hisseleriyle ma‘an bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Recebi’l-ferd’inin yirmi yedinci günü târihiyle müverraha İsparta kazâsı nâibi Bağdâdîzâde es-Seyyid Abdurrahim Efendi’nin imzâ ve hâtemini hâviye bir kıt‘a vekâlet hücceti ve zahrına muharrer Hamid Sancağı Bidâyet Mahkemesi’nin mazbatası mantûklarınca karındaşlarım gāibûn-ı merkūmûndan İvaz bi’l-asâle ve bi’l-vesâye ve Despina ve Gustov? ve Dilhem? bi’l-asâle taraflarından beni bi’l-muvâcehe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn eylediklerinde ben dahi vekâlet-i mezkûreyi kabûl etmemle suâl olunup yirmi sekiz sehm âlât-ı gedik-i mezkûrdan karındaşlarım gāibûn ve sıgār-ı merkūmûnun hisselerden keff-i yed ve bana [41] teslîme merkūm Haci Sava’ya tenbîh olunmak murâdımdır dedikde gıbbe’s-suâl ol dahi cevâbında hisse-i âlât-ı gedik-i mezkûra vaz‘-ı yedini tâyi‘an ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata-i mezkûru mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâneden tahşiye ve temhîr kılındığı ve me‘âli dahi müdde‘î-i merkūmun takrîr-i meşrûhuna mutâbık olduğu ve mazbata-i mezkûre dahi mazmûn-ı hüccet-i mezkûreyi müeyyid ve musaddık bulunduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu misillü tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla müdde‘î-i merkūmun vekâletine ba‘de’l-hükm ve’t-tenbîh Astarcılar kethudâsı tarafından i‘tâ olunan memhûr bir kıt‘a ilmühaber mantûkunca sıgār-ı merkūmûnun gedik-i mezkûrda olan hisse-i şâyi‘aları bundan akdem lede’l-müzâyede ve gıbbe inkı[tâ]‘i’r-rağbe el-yevm bedel-i misli idiği zeyl-i kitâbda muharrerü’l-esâmî Müslimîn ihbârlarıyla zâhir ve mütehakkık olan lira-yı Osmânî yüz guruş hesâbıyla iki bin yüz altmış yedi guruş mukābelesinde bâ-re’y-i mütevellî âhara ferâğa kıbel-i şer‘den müvekkili karındaşı gāib-i merkūm İvaz’a izâfetle vekîl-i merkūm Tanaş’a izin verilmeğin mâ-vaka‘a bi’t-taleb ketb olundu. Fî 9 Zilhicce sene [1]300 Şühûdü’l-hâl: Şükrü Efendi b. Hüseyin, Münâdî el-Hâc Numan Ağa b. Abdüllatif ve gayruhum.