Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 107 Hüküm no: 64 Orijinal metin no: [41-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hanım’ın ev eşyalarını gelini Fâtımatü’z-zehra Hanım’a satması Yusuf Cemal, mübâya‘a-i eşyâ Numara: 27, 19 guruş Husûs-ı âti’l-beyânın mahâllinde ketb ü tahrîri içün savb-ı şer‘-i enverden irsâl olunan Kâtib Yusuf Cemal Efendi Hazîne-i Evkāf-ı Hümâyûn’dan mazbût evkāfdan cennet-mekân Sultan Selim Hân-ı kadîm -tâbe serâhû- Hazretleri Evkāf-ı şerîfeleri hudûdu dâhilinde medîne-i Üsküdar’a muzâfe Nerdubân karyesinde vâki‘ müteveffâ Âgâh Efendi zevcesi Fâtımatü’z-zehra Hanım’ın karye-i mezkûrede kâin yirmi bir numaralı menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî etdikde mezbûrenin kāyın vâlidesi olup menzil-i mezkûrda sâkine ve zâtı Müslimûn-ı mezbûrûn ma‘rifetleriyle mu‘arrefe olan Hafize Hanım bt. Mustafa m. gelini olup zâtı Müslimûn-ı mezbûrûn ta‘rîfleriyle mu‘arrefe işbu bâ‘isetü’l-vesîka mezbûre Fâtımatü’z-zehra Hanım bt. Hüseyin mahzarında ikrâr-ı tam ve takrîr-i kelâm edüp akd-i âti’z-zikrin sudûruna değin yedimde emvâlim olup işbu meclis-i şer‘de mu‘âyene olunan yün memlû bir minder ve kıtık memlû on iki yasdık ve paçavra memlû bir minder ve yün memlû iki döşek ve penbe memlû altı yasdık ve elvân dört saçak ve nühâs altı sahan ma‘a kapak ve dört tencere ma‘a kapak ve sagīr ve kebîr İskeçe iki sini ve üç tepsi ve bir süzgü ve bir karavana ve iki güğüm ve bir maşraba ve iki köhne keçe ve bir mangalımı gelinim mezbûre Fâtımatü’z-zehra Hanım’a tarafeynden bi’l-îcâb ve’l-kabûl bâtten ve sahîhan bi-safkatin vâhidetin sekiz yüz guruşa bey‘ ü temlik ve herbirini vech-i lâyıkıyla teslîm eylediğimde ol dahi ber-vech-i muharrer iştirâ ve tesellüm ve kabz ü kabûl eyledikden sonra semen-i mezkûr sekiz yüz guruşun mutâlebesine müte‘allika da‘vâdan gelinim mezbûrenin zimmetini ibrâ-i sahîh-i şer‘î ile ibrâ ve ıskāt eylediğimde ol dahi ibrâ-i mezkûrumu kabûl etmekle fîmâ-ba‘d eşyâ-i muharrere-i mezkûreden benim aslâ ve kat‘a alâka ve medhalim kalmayıp gelinim mezbûrenin emvâl-i müşterâsı ve hakk-ı sırfı olmağla menzil-i mezkûr derûnunda mevcûde sâir melbûsât ve mefrûşât ve evânî-i nühâsiye ve gayr-ı nühâsiye ve esâs-ı beytin mecmû‘u gelinim mezbûre Fâtımatü’z-zehra Hanım’ın mâlı olup benim işbu üzerime lâbis olduğum köhne libâsımdan gayrı mâl ıtlâk olunur bir nesnem yokdur dedikde gıbbe’t-tasdîki’ş-şer‘î vukū‘-ı hâli kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediğini Teftîş-i Evkāf Mahkemesi Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 9 Şevvâl sene [1]300 Şühûdü’l-hâl: Karye-i mezkûr imâmı Ali Rıza Efendi b. Mehmed, Muhtâr-ı evvel Ali Bey b. Edhem, Muhtâr-ı sânî Ahmed Ağa b. Mehmed, Karye-i mezkûr ahâlisinden Halil Ağa b. İsmail, Muhzırbaşı Ömer Ağa b. Kadri, Muhzır Mehmed Ağa b. Mustafa ve gayruhum.