Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 110 Hüküm no: 66 Orijinal metin no: [43-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haropsi bt. Markar’ın gedik âletleri hissesine emaneten el koyan Haci Atam’dan hissesini geri almak istemesi Erzurum vilâyeti dâhilinde Erzincan sancağına tâbi‘ Refahiye kazâsında Ezirinsi nâm-ı diğer Melikşerîf karyesinde sâkine Devlet-i Aliyye teba‘asının Ermeni milleti nisvânından Haropsi? bt. el-müteveffâ Markar v. Begos tarafından ber-vech-i âtî vekâlet iddi‘â eden teba‘a ve millet-i merkūmeden işbu bâ‘isü’r-rakīm Haçador v. Begos m. zikri âtî gedik âlâtı hissesine bi’l-emâne vaz‘-ı yedi mütehakkık olan kezâlik teba‘a ve millet-i merkūmeden Haci Atam v. Ohannes muvâcehesinde üzerine da‘vâ ve takrîr-i kelâm edüp mahmiye-i İstanbul’da Tavukpazarı’nda turşucu ve …? dükkânları beynlerinde kâin ma‘lûmü’l-hudûd bir bâb aşçı dükkânı derûnunda mevcûde cennet-mekân Gāzi Sultan Mahmud Hân-ı sânî -tâbe serâhû- Hazretleri Evkāf-ı şerîfeleri müstegallâtından gedik ta‘bîr olunur şehriye yirmi iki buçuk akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla on beş sehm hisse-i şâyi‘ası babası müteveffâ-yı merkūm Markar intikālinden gāibe-i merkūme Haropsi’nin? âdiyen bi’l-icâreteyn taht-ı tasarrufunda ve merkūm Haci Atam hisse-i şâyi‘a-i mezkûreye gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer intikālen mutasarrıf olduğu hisse-i şâyi‘a-i mezkûreyi merkūmun yedinden nez‘ ve kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cemâziyelevvel’inin yirmi beşinci günü târihiyle müverraha kazâ-i mezkûr nâibi Ahmed Nuri Efendi’nin imzâ ve mutâbık hâtemini hâviye bir kıt‘a vekâlet hücceti nâtıka olduğu üzere kazâ-i mezkûr mahkemesinde nâib-i mûmâ-ileyh huzûrunda şühûdmahzarında tarafından beni vekâlet-i mutlaka-i sahîha-i şer‘iye ile bi’l-muvâcehe vekîl nasb ü ta‘yîn eylediğinde ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve bana teslîme merkūm Haci Atam’a tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûre gāibe-i merkūmenin babası müteveffâ-yı merkūm intikālinden bi’l-icâreteyn taht-ı tasarrufunda olup kendüsü dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr edicek, müdde‘î-i merkūmdan ber-vech-i muharrer vekâlet müdde‘âsına [44] mutâbık beyyine taleb olundukda ahrâr-ı ricâl-i Müslimînden ve teba‘a-i Devlet-i Aliyye’den olup bu esnâda Der-aliyye’ye gelen Haçador v. Mardik ve Vartan v. Haçador nâm kimesneler li-ecli’ş-şehâde meclis-i şer‘a hâzırân olup isre’l-istişhâd herbiri müttefikü’l-lafz ve’l-ma‘nâ alâ-vefkı’l-müdde‘î mufassalan edâ-yı şehâdet-i şer‘iye etdiklerinde şâhidân-ı merkūmân Kurukahveciler esnâf kethudâsı Haçik v. Manas ve Lonca ustası Serkiz v. Mıgırdıç nâm kimesnelerden evvelâ bâ-varaka-i mestûre sırran ve ba‘dehû Mısır çarşısı tüccârından Mehmed Efendi b. Abdullah ve Kurukahveci esnâfından Artin v. Gazban ve esnâf-ı mezkûreden İstefan v. Serkiz ve yine esnâf-ı mezkûreden Mıgırdıç v. Artin’den alenen dahi lede’t-tezkiye adl ve makbûlü’ş-şehâde oldukları zîr-i varakaya tahrîr ve ihbâr olunmağın mûcebince ba‘de’l-hükm hisse-i şâyi‘a-i mezkûreden keff-i yed ve vekîl-i merkūm Haçador’a vech-i lâyıkıyla teslîme merkūm Haci Atam’a tenbîh olunmağın mâ-vaka‘a bi’t-taleb ketb olundu. Fî 20 Ramazan sene [1]300 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum. [45 ve 46. sayfalar boştur]