Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 112 Hüküm no: 67 Orijinal metin no: [47-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulkadir Efendi’nin vefatıyla küçük oğlu Mehmed Tevfik’e intikal eden ev ve bahçe hissesinin satışına izin verilmesi İbrahim, izin: 1 kıt‘a Numara: 4, 56 guruş Der-zaman-ı Bedreddin Efendizâde fazîletlü Ahmed Muhtâr Efendi Hazretleri Fî 7 Zilhicce sene 1300 Mahmiye-i İstanbul’da Süleymaniye Câmi‘-i şerîfi civârında Hoca Gıyaseddin mahallesinde sâkin iken bundan akdem vefât eden Abdulkadir Efendi b. Osman’ın sulbî sagīr oğlu Mehmed Tevfik’in tesviye-i umûruna vasîyy-i mansûbu işbu bâ‘isü’l-kitâb İmâmeci el-Hâc Ahmed Efendi b. Abdülhamid b. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan Kapudan-ı deryâ esbak merhûm Kaymak Mustafa Paşa Vakfı’na bir kıt‘a temessükle şehriye altmış akçe ve merhûm Sarı Bâyezid Vakfı’na şehriye kırk beş akçe icâre-i müeccelelü vakfeyn-i mezkûreyn musakkafâtından mahalle-i mezbûrede câmi‘-i şerîf sokağında beş numara ile murakkam ma‘lûmü’l-hudûd ve’l-müştemilât bir bâb menzil ve müşârün-ileyh Mustafa Paşa Vakfı müstegallâtından menzil-i mezkûr karşısında kâin ma‘lûmü’l-hudûd beher şehr otuz akçe icâre-i müeccelelü bir kıt‘a bağçeden herbiri müteveffâ-yı mezbûrun hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbiye kebîre kızları Fatıma ve Lütfiye ve Zeliha hanımlar[a] hasbe’l-âde islâsen intikāl edüp lâkin menzil-i mezkûr ânen fe-ânen müşrif-i harâb olup ve bağçe-i mezkûrun enkāzı ve eşcârı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun mâlı kalîl olup nafaka ve kisveye dahi eşedd-i ihtiyâc ile muhtâc olmağla sagīr-i mezbûrun menzil ve bağçe-i mezkûrlarda olan sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil ve bağçe-i mezkûrlarda olan sülüs hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin beş yüz kırk bir guruş yirmi sekiz para ve nef‘an li’s-sagīr zam olunan yüz doksan bir buçuk guruş yirmi sekiz para ki cem‘an üç bin yedi yüz otuz üç guruş yirmi sekiz para mukābelesinde âhara ferâğa izin taleb şüd. Fî 19 Zilhicce sene 1300 Şühûd[ü’l-hâl]: Mehmed Ağa b. Mustafa, Mehmed Ziyaeddin Efendi b. Ahmed ve gayruhum.