Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 113 Hüküm no: 68 Orijinal metin no: [47-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lüleci esnafından Mehmed Ağa’nın vefatıyla küçük kızı Hasene’ye intikal eden arsa hissesinin satışına izin verilmesi İbrahim, izin: 1 kıt‘a Numara: 9, 13 guruş Galata’ya muzâfe kasaba-i Fındıklı’da Selime Hatun mahallesinde sâkin iken bundan akdem vefât eden Lüleci esnâfından Mehmed Ağa b. Mustafa’nın sulbiye sagīre kızı Hasane’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Habibe Hanım bt. Hasan m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan Taysî el-Hâc Mustafa Efendi Vakfı’na şehriye otuz akçe ve diğer Mustafa Ağa b. Abdullah Vakfı’na iki kıt‘a temessükle beher şehr otuz akçe icâre-i müeccelelü vakfeyn-i mezkûreyn musakkafâtından mahalle-i mezbûrede câmi‘-i şerîf sokağında on altı numara ile murakkam ma‘lûmü’l-hudûd bir kıt‘a muhterik menzil arsasının rub‘ hisse-i şâyi‘ası müteveffâ-yı mezbûrun hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sagīre-i mezbûreye hasbe’l-âde intikāl edüp lâkin arsa-i mezkûre bî-hâsıl ve etrâfında muhît taş duvarları mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin aslâ mâlı olmayıp nafaka ve kisveye dahi eşedd-i ihtiyâc ile muhtâce olmağla sagīre-i mezbûrenin arsa-i mezkûrede olan rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ mahrûse-i Galata kādısı fazîletlü Mehmed Fevzi Efendi ile dâire-i mezkûre ser-mühendisliği taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin arsa-i mezkûrede olan rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla sekiz yüz elli guruş bedel mukābelesinde âhara ferâğa izin taleb şüd. Fî 19 Zilhicce sene 1300 Şühûd[ü’l-hâl]: Süleyman Ağa b. Ömer, Mûsîka-i Hümâyûn hademesinden Ahmed Efendi b. Ömer ve gayruhum.