Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 114 Hüküm no: 69 Orijinal metin no: [48-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Margarita bt. Dimitri’nin bakkal dükkânı ile içindeki gedik âletlerine el koyan Dimitri v. Nikola’dan dükkân ve âletleri almak üzere Yuvan v. Yeratmoz’a vekâlet vermesi el-Hâc Esad, isbât-ı vekâlet: 1 kıt‘a Numara: 10, 40 guruş Ankara vilâyet-i celîlesi dâhilinde Kayseriye sancağına muzâfe İncesu kazâsına tâbi‘ Karahisâr nâhiyesi kurâsından Orta karyesinde sâkine teba‘a-i Devlet-i Aliyye’nin Rum milleti nisvânından Margarita bt. Dimitri v. Atam tarafından ber-vech-i âtî vekâlet iddi‘â eden işbu bâ‘isü’s-sifr teba‘a-i müşârün-ileyhânın millet-i merkūmesinden Beyoğlu’nda Ağa Câmi‘-i şerîfi kurbünde sâkin Bakkāl Yuvan v. Yeratmoz m. zikri âtî dükkân ve gedik âlâtı hisselerine bi’l-emâne vaz‘-ı yedi mütehakkık olan yine teba‘a-i müşârün-ileyhânın millet-i merkūmesinden Bakkāl Dimitri v. Nikola muvâcehesinde üzerine da‘vâ ve takrîr-i kelâm edüp Haremeynü’ş-şerîfeyn -şerrefehümullâhu te‘âlâ fi’d-dâreyn- Evkafı musakkafâtından mezkûr Beyoğlu’nda Hüseyin Ağa mahallesinde ve Cadde-i Kebîr’de vâki‘ yüz kırk bir ve yüz kırk iki numara ile murakkam ma‘lûmü’l-hudûd şehriye altı buçuk akçe bir pul icâre-i müeccelelü nısfdan sülüs hisse bakkāl dükkânı ve dükkân-ı mezkûr derûnunda mevcûde Hazîne-i Haremeyn-i Muhteremeyn Evkāfı müstegallâtından gedik ta‘bîr olunur şehriye altmış akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla yirmi sehm hissesinden herbiri gāibe-i merkūmenin bâ-sened-i hâkānî ve nizâm bi’l-icâreteyn taht-ı tasarrufunda ve merkūm Dimitri hisse-i dükkân ve gedik-i mezkûrlara gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer mutasarrıfa olduğu hisseteyn-i mezkûreteyni merkūm Dimitri yedinden nez‘ ve kabz ve ba‘de’l-kabz nısfdan sülüs hisse dükkân ve yirmi sehm gedik-i mezkûrların nısf hisselerini iki bin guruş bedel-i makbûz mukābelesinde kızı Susane’ye ve diğer nısf hisselerini dahi kezâlik iki bin guruş bedel-i makbûz mukābelesinde diğer kızı Katrine’ye ferâğlarını Senedât İdâresi’nde memûru huzûrunda takrîre ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Cemâziyelâhire’sinin on beşinci günü târihiyle müverraha kazâ-i mezkûr nâibi es-Seyyid Mustafa Nuri Efendi’nin imzâ ve hâtemini hâviye bir kıt‘a vekâlet hücceti ve zahrında muharrer İncesu Kazâsı Bidâyet Mahkemesi’nin memhûr mazbatası mantûklarınca mahkeme-i mezbûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisseteyn-i mezkûreteynden keff-i yed ve bana teslîme merkūm Dimitri’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisseteyn-i mezkûreteyn gāibe-i merkūmenin ber-vech-i muharrer tasarrâfunda olup kendüsü dahi bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve me‘âli müdde‘î-i merkūmun takrîr-i meşrûhuna mutâbık bulunduğu ve mazbata-i mezkûre dahi hüccet-i mezkûreyi müeyyid ve musaddık olarak hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci bendi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla müdde‘î-i merkūmun vekâletine ba‘de’l-hükm hisseteyn-i mezkûreteynden keff-i yed ve vech-i lâyıkıyla müdde‘î vekîl-i mezbûr Yuvan’a teslîme merkūm Dimitri’ye tenbîh olunmağın mâ-vaka‘a bi’t-taleb ketb olundu. Fî 18 Zilhicce sene 1300 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.