Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 115 Hüküm no: 70 Orijinal metin no: [49-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin vefatıyla küçük oğlu Mehmed Hidayet Molla’ya intikal eden oda gediği hissesinin satışına izin verilmesi Mahmiye-i İstanbul’da Laleli kurbünde Kızıltaş mahallesinde sâkin iken bundan akdem vefât eden el-Hâc İbrahim Efendi b. Hasan’ın sulbî sagīr oğlu es-Seyyid Mehmed Hidayet Molla’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emine Hanım bt. Abdullah m. bi’l-vesâye takrîr-i kelâm ve ta‘bîr ani’l-merâm edüp mahmiye-i mezbûrede Çarşı-yı Kebîr’de Bodrum Hanı derûnunda alt katda vâki‘ yirmi yedi numara ile murakkam bir bâb oda derûnunda mevcûde Hazîne-i Haremeyn-i Muhteremeyn Evkāfı müstegallâtından oda gediğinin altı sehm i‘tibârıyla şehriye altı akçe südüs pul icâre-i müeccelelü bir sehminin sülüs hissesi sagīr-i mezbûrun bâ-temessük [ve] nizâm bi’l-icâreteyn taht-ı tasarrufunda olup lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâc ile muhtâc olmağla sagīr-i mezbûrun hisse-i şâyi‘a-i mezkûresi diğer müşterekleri hisseleriyle ma‘an âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun hisse-i şâyi‘a-i mezkûresi bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan bin üç yüz otuz üç buçuk guruş mukābelesinde bâ-re’y-i mütevellî âhara ferâğa izin taleb şüd. Fî 27 Zilhicce sene [1]300 Şühûdü’l-hâl: Çarşı-yı Kebîr’de Yağlıkçı esnâfından Ali Rıza Efendi b. el-Hâc İbrahim, Esnâf-ı merkūmeden Mehmed Ağa b. el-Hâc Süleyman ve gayruhum.