Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 116 Hüküm no: 71 Orijinal metin no: [49-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feride Hanım’ın vefatıyla küçük oğlu Mehmed Ziyaeddin’e intikal eden arsalardaki hisselerinin satışına izin verilmesi Aşçızâde Mehmed, izin: 1 kıt‘a Numara: 23, 300 guruş Medîne-i Üsküdar’a tâbi‘ Kādı karyesinde Osman Ağa mahallesinde sâkine iken bundan akdem vefât eden Feride Hanım bt. Hüseyin Hüsnü Bey’in sadrî sagīr oğlu Mehmed Ziyaeddin’in babası ve velîsi olup mahmûdü’l-hâl idiği bi’l-ihbâr zâhir olan işbu bâ‘isü’l-kitâb Mehmed Emin Bey b. İbrahim Faik m. bi’l-velâye takrîr-i kelâm edüp Hazîne-i Evkāf-ı Hümâyûn’dan mazbûten idâre olunan evkāfdan Dârü’s-saâdeti’ş-şerîfe ağası esbak merhûm İbrahim Ağa Vakfı musakkafâtından mahalle-i mezkûrede Yeldeğirmeni nâm mahâlde vâki‘ kırk iki ve sekiz ve yirmi iki ve yirmi dört ve yirmi sekiz numaralar ile murakkam herbiri ma‘lûmü’l-hudûd iki kıt‘a temessük mantûklarınca şehriye cem‘an bin dört yüz on iki akçe icâre-i müeccelelü mukaddemâ üç bin dört yüz yetmiş beş zirâ‘ el-yevm cem‘an üç bin altı zirâ‘ beş kıt‘a arsa müteveffât-ı mezbûrenin bi’l-icâreteyn taht-ı tasarrufunda olup ba‘de vefâtihâ sagīr-i mezbûra hasbe’l-âde intikāl edüp lâkin arsa-i mezkûrların etrâfını muhît taş duvarları mürûr-ı eyyâm ile münhedim olarak telef ve zâyi‘ olacağı zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafakasına kâfi mâlı olmayıp ve ben dahi mu‘sir olmamla nafaka ve kisveye dahi eşedd-i ihtiyâcı olmağla sagīr-i mezbûrun arsa-i mezkûrelerini bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffât-ı mezbûrenin defter-i kassâmı zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Onuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun arsa-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir [olan] lira-yı Osmânî yüz guruş hesâbıyla yirmi bin guruş bedel mukābelesinde âhara ferâğa izin taleb şüd. Fî 28 Zi[lhicce] sene 1300 Şühûdü’l-hâl: Mustafa Nuri Efendi b. Mehmed İzzet, Mehmed Ağa b. Osman ve gayruhum.