Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 117 Hüküm no: 72 Orijinal metin no: [50-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın vefatıyla küçük çocukları Ahmed Cemaleddin ve Fatma Mükerreme’ye intikal eden ev hisselerinin satışına izin verilmesi Aşçızâde Mehmed, izin: 1 kıt‘a Numara: 16, 71 guruş Galata’ya muzâfe kasaba-i Fındıklı’da Molla Çelebi mahallesi ahâlisinden olup bundan akdem Hicaz vilâyet-i celîlesi dâhilinde Cidde kazâsında vefât eden Tophâne-i âmire marangozlarından el-Hâc İbrahim Ağa b. Hasan’ın sulbî sagīr oğlu Ahmed Cemaleddin ve sulbiye sagīre kızı Fatıma Mükerreme’nin vâlideleri ve tesviye-i umûrlarına bâ-hüccet-i şer‘iye vasîyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘is[et]ü’l-vesîka Şefika Hanım bt. Ahmed m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan zikr olunan merhûm Molla Çelebi Vakfı musakkafâtından mahalle-i mezkûrede kâin iki numara ile murakkam ma‘lûmü’l-hudûd ve’l-müştemilât şehriye yedi buçuk [akçe] icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile diğer sulbî kebîr oğulları Mehmed Halîfe ve Abdullah Halid Efendilere hasbe’l-âde irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīrân-ı mezbûrânın menzil-i mezkûrda olan iki rub‘ hisse-i şâyi‘alarını bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffâ-yı mezbûrun defter-i kassâmı zeyline idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ Galata kādısı Ahmed Fevzi Efendi ile Altıncı Dâire-i Belediyesi taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan iki rub‘ hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan mecîdiye altını yüz guruş hesâbıyla dört bin yedi yüz elli guruş bedel mukābelesinde âhara ferâğa izin taleb şüd. Fî 23 Zilhicce sene 1300 Şühûdü’l-hâl: Abdullah Efendi b. İbrahim, İbrahim Efendi b. İbrahim ve gayruhum.