Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 118 Hüküm no: 74 Orijinal metin no: [50-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Birinci Hukuk Reisi Şemseddin Bey’in vefatıyla küçük kızlarına intikal eden evin satışına izin verilmesi Mustafa Zühdü, izin: 1 kıt‘a Numara: 34, 600 guruş Merhûme ve mağfûrun-lehâ Mihrimah Sultan -tâbe serâhâ- hazretlerinin vakf-ı şerîfi arâzisinden Üsküdar’a muzâfe Nerdubân karyesinde Sahrâ-yı Cedîd nâm mahâlde bir bâb köşkde sâkin iken bundan akdem vefât eden Birinci Hukūk Reisi Şemseddin Bey b. Ahmed’in sulbiye sagīre kızları Fatıma Hayriye ve Âişe Melek ve Emine Nesibe ve Hadice Münevvere hanımların vâlideleri ve tesviye-i umûr[ları]na bâ-hüccet-i şer‘iye vasîyy-i mansûbeleri zâtı ta‘rîf-i şer‘î ile mu‘arrefe işbu bâ‘isetü’l-kitâb Sarayî Fatıma Hüsnügül Hanım bt. Abdullah m. bi’l-vesâye takrîr-i kelâm edüp Hudâvendigâr-ı esbak cennet-mekân Sultan Mahmud-ı Hân-ı evvel -tâbe serâhû- Hazretleri Vakfı musakkafâtından İstanbul’da Bâbıâlî civârında Nallı Mescid mahallesinde Gülhan sokağında kâin ma‘lûmü’l-hudûd ve’l-müştemilât şehriye doksan akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı mezbûrûna hasbe’l-âde irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sıgār-ı mezbûrûn haklarında muzır ve gayr-ı müfîd olduğundan mâ‘adâ sıgār-ı mezbûrûnun nafaka ve kisveye dahi eşedd-i ihtiyâcı olmağla sıgār-ı mezbûrûnun menzil-i mezkûrları bedel-i misliyle bâ-re’y-i mütevellî âhara ferâğa ve bedeli ahz ü kabz ve müteveffâ-yı mezbûrun Mahkeme-i Teftîş’den tahrîr olunan terekesi defter-i kassâmı zeyline idhâl birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı mezbûrûn haklarında vücûhla enfa‘ ve evlâ olduğuna binâen işbu yedimde olup [51] Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sıgār-ı mezbûrûnun menzil-i mezkûrları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla kırk bin guruş mukābelesinde bâ-re’y-i mütevellî âhara ferâğa izin taleb şüd. Fî 28 Zilhicce sene 1300 Şühûdü’l-hâl: Münâdî Ahmed Ağa b. Abdullah, Muhzırbaşı Ömer Ağa b. Abdulkadir ve gayruhum.