Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 119 Hüküm no: 75 Orijinal metin no: [51-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divan-ı Hümayun Teşrifatçısı Memduh Efendi’nin bahçe vakfiyesi Numara: 12, 100 guruş Mâ fîhi mine’l-vakfi ve’ş-şurût cerâ lede’l-müvellâ Mahmud Aziz Efendi el-mezûn bi’l-hükmi fi’l-husûsi’l-mezkûr ve hukime bi-sıhhatihî ve lüzûmihî âlimen bi’l-hilâf beyne’l-eimmeti’l-eslâf ve ünhiye ileyye ve ene’l-fakīr Bedreddin Efendizâde Ahmed Muhtâr el-müfettiş li-umûri’l-evkāf -gufire lehümâ- El-hamdü lillâhillezî e‘azze havâssa ibâdihî bi-sarfi emvâlihim ilâ-envâ‘i’l-hayrât ve e‘ânehumalâ iktisâbi esnâfi’l-mehâmid ve’l-meberrât ve’s-salâtü ve’s-selâmü alâ-rasûlihî ve nebiyyihî Muhammedin hayrü’l-beriyyât ve alâ-âlihî ve ashâbihî ilâ-yevmin yestezıllu’l-mer’u tahte’s-sadâkāt ammâ ba‘d, işbu sebt-i zeyl olunan vakfiye-i ma‘mûlün-bihânın hilâl-i sutûrunda münderice vakf-ı şerîfin vâkıfı ve bi’l-meşrûta mütevellîsi hâlâ Teşrîfâtî-i Dîvân-ı Hümâyûn sâhibü’l-hayrât ve râgıbü’l-meberrât sa‘âdetlü Memduh Efendi Hazretleri b. Abdullah savb-ı şer‘-i enverden bi’l-iltimâs me’zûnen bi’l-hükm ta‘yîn ve irsâl olunan Kâtib Mahmud Aziz Efendi’nin mahmiye-i İstanbul’da Ayasofya-i Kebîr mahallesinde Muvakkithâne sokağında vâki‘ üç numara ile murakkam sâkin oldukları konaklarında zeyl-i kitâbda muharrerü’l-esâmî Müslimîn huzûrlarında akd eylediği meclis-i şer‘-i şerîf-i enver ve mahfil-i dîn-i münîf-i ezherde zikri âtî vakfına li-ecli’t-tescîl ve li-itmâmi emri’l-vakfı ve’t-tekmîl mütevellî nasb ü ta‘yîn eylediği sulbî mahdûmu Mehmed Şefik Bey mahzarında ikrâr-ı sahîh-i şer‘î ile ve i‘tirâf-ı sarîh-i mer‘î edüp yedimde olup bin iki yüz doksan sekiz senesi Şubat’ının yirmi dördüncü günü târihiyle müverraha bir kıt‘a sened-i hâkānî mantûkunca vakf-ı câi’z-zikrin sudûruna değin silk-i mülk-i sahîhimde münselik olup mahmiye-i mezkûrede Koca Mustafa Paşa mahallesinde Ramazan Efendi Dergâhı sokağında vâki‘ bir tarafdan Kırımlı Hüseyin Ağa b. Ahmed’in menzili ve bağçesi ve iki tarafdan Münire Hanım bt. Abdurrahman’ın mülk arsası ve taraf-ı râbi‘i tarîk-i âm ile mahdûd yirmi numara ile murakkam etrâf-ı erba‘ası taş duvar ile muhât derûnunda eşcâr-ı müsmire ve gayr-ı müsmireyi hâvî terbî‘an yedi yüz altmış zirâ‘ bir kıt‘a mülk bağçemi hasbeten lillâhi’l-ahad ve taleben li-merzâti’r-rabbi’s-samed vakf-ı sahîh-i şer‘î-i müebbed ve habs-i sarîh-i mer‘î-i muhalled ile vakf ve habsedüp şöyle şart ve ta‘yîn eyledim ki bağçe-i mezkûre icâre-i vâhide-i sahîha-i şer‘iye ile bâ-yed-i mütevellî âhara îcâr olunup hâsıl olan icâresinden mezkûr Ayasofya-i Kebîr Câmi‘-i şerîfinde müezzin mahfilinde beher yevm kable salâti’l-mağrib mücevvid ve ehl-i Kur’ân bir kimesne sûre-i Yâsîn-i şerîf tilâvet ve kırâet edüp kārî-i mûmâ-ileyhe li-ecli’s-sıla? şehriye elli guruş vazîfe verile ve câmi‘-i şerîf-i müşârün-ileyhde her kim imâm-ı evvel olur ise sûre-i Yâsîn-i şerîfe-i mezkûrenin vaktinde ale’d-devam kırâetine nezâret edüp kezâlik li-ecli’’s-sıla? senevî yüz guruş nezâret vazîfesi verile ve icâre-i mezkûreden yedine fazla kalır ise fazla-i mezkûre ile bağçe-i mezkûrenin duvar ve sâir ta‘mîre muhtâc olan mahalleri ta‘mîr ve termîm ve eşcâr gars olundukdan sonra bâkī kalan fazlasını mütevellî bulunan zât vazîfe mukābili kendi umûruna sarf eyleye ve vakf-ı mezkûrumun tevliyeti hayatda oldukça nefsime ve vefâtımdan sonra vakfiye-i ûlâmda ta‘yîn eylediğim vechile vakf-ı evvelime her kim mütevellî olur ise âna meşrûta ola ve mürûr-ı eyyâm ile ve kürûr-ı a‘vâm ile icrâ-yı şerâit-i mezkûreye ri‘âyet müte‘azzire olur ise menâfi‘-i vakf mutlakā fukarâ-i Müslimîne sarf oluna ve vakf-ı mezkûrumun tebdîl ü tağyîr ve taklîl ü teksîr ve tevkīr ve idhâl ü ihrâcı merreten ba‘de uhrâ ve kerreten gıbbe ûlâ yed ve meşiyetimde ola deyü ta‘yîn-i şurût ve tebyîn-i kuyûd birle bağçe-i mezkûreyi yedinden mütevellî-i mûmâ-ileyhe teslîm eylediğimde ol dahi vakfiyet üzere tesellüm ve kabûl ve sâir evkāf mütevellîlerinin tasarrufları misillü tasarruf eyledi dedikde gıbbe’t-tasdîki’ş-şer‘î emr-i vakf tamam ve hâl-i teslîm encâm bulunmuş iken vâkıf-ı müşârün-ileyh vakf-ı mezkûrunu ihkâm ve şurût ve kuyûdunu istihkâm irâde-i hayriyesiyle vakf-ı mezkûrdan rücû‘ ve bağçe-i mezkûreyi ke’l-evvel mülküne istirdâda şürû‘ ve mütevellî-i mûmâ-ileyh dahi reddü teslîmden ibâ ve imtinâ‘ ile kâtib-i me’zûn-ı mûmâ-ileyh huzûrunda [52] kemâ-hüve’l-mastûr ve’l-meşhûr fi’l-kütübi’l-fıkhiyye müterâfi‘ân ve herbiri mübtegāsınca fasl ü hasma tâlibân olduklarında kâtib-i mûmâ-ileyh dahi âlimen bi’l-hilâfi’l-cârî beyne’l-eimmeti’l-eslâf alâ-kavli men-yerâhu mine’l-eimmeti’l-müctehidîn -rıdvânullâhi te‘âlâ aleyhim ecma‘în- cânib-i vakfı tercîhan ve işbu emr-i hayrı tetmîmen vakf-ı mezkûrun evvelâ sıhhatine ve sâniyen lüzûmuna ve şurûtunun cevâzına hükm-i sarîh-i şer‘î ve kazâ-i sarîh-i mer‘î eylediğini mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîri ba‘de’t-tenfîzi’l-mu‘teberi’ş-şer‘î vakf-ı mezkûr sahîh ve lâzım olup min-ba‘d nakz ü ibtâli muhâl ve tebdîl ü tağyîri vâkıf-ı mûmâ-ileyhden gayra adîmü’l-ihtimâl oldu, cerâ zâlik. Fî 21 Zilhicce sene [1]300 Şühûd[ü’l-hâl]: Teşrîfâtî-i Dîvân-ı Hümâyûn hulefâsından Osman Efendi b. Mehmed, Hüseyin Hüsnü Efendi b. Osman, Mûmâ-ileyhin teba‘asından Ebûbekir Ağa b. Halil, Mehmed Emin Ağa b. Mustafa ve gayruhum.