Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 121 Hüküm no: 76 Orijinal metin no: [52-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Cânib Efendi’nin vefatıyla küçük oğlu Ahmed Şuayb Efendi’ye intikal eden ev, bağ ve su hisselerinin satışına izin verilmesi İsmail Hakkı, izin: 1 kıt‘a Numara: 30, 177,5 guruş Mahmiye-i İstanbul’da Sultan Selim Câmi‘-i şerîfi civârında Mismâr Şücâeddin mahallesinde sâkin iken bundan akdem vefât eden Salih Cânib Efendi b. Hüseyin Ağa’nın sulbî sagīr oğlu Ahmed Şuayb Efendi’nin min-kıbeli’l-eb ceddi ve velîsi işbu bâ‘isü’l-kitâb Hüseyin Ağa b. Ahmed m. bi’l-velâye takrîr-i kelâm edüp Haremeyn-i Muhteremeyn Hazînesi’nden mazbût evkāfdan Kapudan-ı deryâ esbak merhûm Kılıç Ali Paşa Vakfı musakkafâtından mahalle-i mezbûrede kâin ma‘lûmü’l-hudûd ve’l-müştemilât iki kıt‘a temessük mantûkunca şehriye yüz yirmi akçe icâre-i müeccelelü bir bâb kebîr menzilin rub‘ hisse-i şâyi‘ası ve derûnuna cârî cennet-mekân firdevs-âşiyân Gāzi Sultan Mehmed Han -aleyhi’r-rahmetü ve’l-gufrân- Hazretlerinin Evkāf-ı celîleleri Vakfı musakkafâtından senevî otuz guruş icâre-i müeccelelü kanavât müsennâtına teba‘iyetle bir masura mâ-i lezîzin bir kıt‘a temessükle sülüs hisse-i şâyi‘ası ve Haremeyn-i Muhteremeyn’e mülhak evkāfdan Şeyhülislâm-ı esbak merhûm Ebuishak İsmail Efendi Vakfı’na iki kıt‘a temessük mantûklarınca şehriye on beş akçe ve Kapudan-ı deryâ esbak merhûm Kaymak Mustafa Paşa Vakfı’na bir kıt‘a temessükle şehriye altmış akçe icâre-i müeccelelü vakfeyn-i mezkûreyn musakkafâtından menzil-i mezkûr karşısında kâin ma‘lûmü’l-hudûd bir kıt‘a bağçenin rub‘ hisse-i şâyi‘ası müteveffâ-yı mezbûrun hayatında bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip ve mâ-i lezîz-i mezkûrun kanavâtı ve bağçe-i mezkûrenin dahi eşcârı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı nâfi‘ olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil ve bağçe ve mâ-i lezîz-i mezkûrlarda olan hisse-i şâyi‘a-i mezkûreleri bedel-i misilleri ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil ve bağçe ve mâ-i lezîz-i mezkûrlarda olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla menzil-i mezkûrda olan rub‘ hisse-i şâyi‘ası altı bin iki yüz elli guruş ve bağçe-i mezkûrda olan rub‘ hisse-i şâyi‘ası bin iki yüz elli guruş ve mâ-i lezîz-i mezkûrda olan sülüs hisse-i şâyi‘ası dahi beş bin guruş ki cem‘an on iki bin beş yüz guruş mukābelesinde âhara ferâğa izin taleb şüd. Fî 5 Muharrem sene [1]301 Şühûd[ü’l-hâl]: Muhzır Süleyman Latif Ağa b. el-Hâc Abdürrefik, es-Seyyid Mehmed Efendi b. İbrahim.