Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 122 Hüküm no: 77 Orijinal metin no: [53-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife İkbal Hanım’ın vefatıyla küçük oğlu Mehmed Veysi Bey’e intikal eden ev hissesinin satışına izin verilmesi Nazmi, izin: 1 kıt‘a Numara: 36, 38 guruş Mahmiye-i İstanbul’da Zincirlikuyu kurbünde Atik Ali Paşa mahallesinde sâkine iken bundan akdem vefât eden Hanife İkbal Hanım bt. Abdullah’ın sulbî sagīr mahdûmu Mehmed Veysi Bey’in pederi ve velîsi olup mahmûdü’l-hâl idiği ihbâr olunan işbu bâ‘isü’l-kitâb Mehmed Salih Efendi b. Mehmed Emin m. bi’l-velâye takrîr-i kelâm ve ta‘bîr ani’l-merâm edüp Hazîne-i Haremeyn’den mazbût evkāfdan merhûme Fahri Sultan Vakfı musakkafâtından mahalle-i mezbûrede Poyraz sokağında üç numara ile murakkam ma‘lûmü’l-hudûd ve’l-müştemilât şehriye otuz üç buçuk ve rub‘ akçe icâre-i müeccelelü bir bâb menzilin rub‘ hisse-i şâyi‘ası sagīr-i mezbûrun bâ-temessük-i mütevellî bi’l-icâreteyn taht-ı tasarrufunda olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı nâfi‘ olduğundan mâ‘adâ üç rub‘ hissesinin mutasarrıfları hisselerini âhara ferâğ edeceklerinden sagīr-i mezbûrun hissesinin dahi hısas-ı sâire mutasarrıflarıyla ma‘an bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla iki bin beş yüz guruş mukābelesinde âhara ferâğa izin taleb şüd. Fî 4 Muharrem sene 1301 Şühûd[ü’l-hâl]: Hasan Efendi b. Hüseyin, Rıza Efendi [b.] Hüseyin ve gayruhum.