Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 123 Hüküm no: 78 Orijinal metin no: [53-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Sıddıka’nın vefatıyla küçük kızı Şerife Emine’ye intikal eden evin satışına izin verilmesi Nazmi, izin: 1 kıt‘a Numara: 28, 60 guruş Mahmiye-i İstanbul’da Zincirlikuyu kurbünde Atik Ali Paşa mahallesinde sâkine iken bundan akdem vefât eden Şerife Âişe Sıddıka bt. Mehmed’in sadriye sagīre kızı Şerife Emine’nin babası ve velîsi olup mahmûdü’l-hâl idiği ihbâr olunan işbu bâ‘isü’l-kitâb Mehmed Salih Çavuş Ağa b. Mustafa m. bi’l-velâye takrîr-i kelâm edüp Haremeyn-i Muhteremeyn Evkāfı musakkafâtından mahalle-i mezbûrede Câbî sokağında on sekiz numara ile murakkam ma‘lûmü’l-hudûd ve’l-müştemilât beher şehr on beş akçe icâre-i müeccelelü bir bâb menzil vâlidesi olup kendüden evvel vefât eden Ali Kapudan zevcesi Emine Hanım bt. Abdullah intikālinden müteveffât-ı mezbûrenin hayatında âdiyen bi’l-icâreteyn taht-ı tasarrufunda olup ba‘de vefâtihî sagīre-i mezbûreye hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmediğinden bekāsı sagīre-i mezbûrenin hakkında muzır ve gayr-ı müfîd olmağla sagīre-i mezbûrenin menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla dört bin guruş mukābelesinde âhara ferâğa izin taleb şüd. Fî 2 Muharrem sene [1]301 Şühûd[ü’l-hâl]: Abdullah Efendi b. Mehmed, Rıza Efendi b. Hüseyin ve gayruhum. Derûn-ı hüccetde bast ü beyân olunduğu üzere veliyy-i mezbûr Mehmed Salih Çavuş kızı sagīre-i mezbûrenin menzil-i mezkûrunu bedel-i misli idiği mütehakkık olan lira-yı Osmânî yüz guruş hesâbıyla dört bin guruş mukābelesinde Rıza Efendi b. Mehmed’e ol dahi der-akab meblağ-ı merkūm mukābelesinde veliyy-i mezbûra ba‘de’l-ferâğ veliyy-i mezbûr kızı sagīre-i mezbûre malından ve li-ecli’l-idâne vasî nasb olunan mezbûr Rıza Efendi yedinden istidâne ve kabz ve bilâ-zarûre umûruna sarfla istihlâk eylediği <> zimmetinde zamanen deyni olan lira-yı Osmânî yüz guruş hesâbıyla dört bin guruş deyni mukābelesinde sagīre-i mezbûreye vefâen ferâğ edeceğinden ol-vechile ferâğı icrâ ve sened-i hâkānîsi i‘tâ olunmak üzere işbu mahalle şerh verildi.