Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 124 Hüküm no: 79 Orijinal metin no: [54-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şevki Efendi’nin vefatıyla küçük kızı Emine Seza’ya intikal eden oda ve ev arsasının satışına izin verilmesi İsmail Hakkı, izin Numara: 7, 28 guruş Çekmece-i sagīr kazâsına tâbi‘ Makrihora karyesinde Zeytinburnu Demirhânesi’nde sâkin iken bundan akdem vefât eden Birinci Sanâyi‘ Alay Kâtibi el-Hâc Şevki Efendi b. Abdülhalim’in sulbiye sagīre kızı Emine Seza’nın min-kıbeli’l-üm ceddesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isetü’l-kitâb Zeliha Hatun bt. Mahmud Aziz m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme Şahi Hatun Vakfı’ndan Hazret-i Ebî Eyyûb el-Ensârî mahallâtından Evlice Baba mahallesinde Bülbülderesi caddesinde vâki‘ bir numara ile murakkam ma‘lûmü’l-hudûd ve’l-müştemilât şehrî otuz akçe icâre-i müeccelelü derûnunda bir bâb odayı müştemil bir kıt‘a menzil arsası sagīre-i mezbûrenin bâ-temessük-i mütevellî bi’l-icâreteyn taht-ı tasarrufunda olup lâkin oda-i mezkûr ânen fe-ânen müşrif-i harâb ve arsa-i mezkûrenin etrâfını muhît taş duvarları mürûr-ı eyyâm ile münhedim ve enkāzı telef ve zâyi‘ olacağı zâhir ve bedîdâr olup ol-vechile bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin ma‘a oda arsa-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre kādîsı fazîletlü es-Seyyid Hüseyin Neşet Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûre ma‘a oda arsa-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin sekiz yüz elli bir guruş mukābelesinde âhara ferâğa izin taleb şüd. Fî 20 Zi[lhicce] sene [1]300 Şühûd[ü’l-hâl]: Ahmed Ağa b. Mehmed, Muhzır el-Hâc Nuri Ağa b. Veysi ve gayruhum