Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 125 Hüküm no: 80 Orijinal metin no: [54-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadr-ı esbak Damad Melek Paşa, hanımı Zeyneb Sultan ve Ayşe Hanım, ceddi Abdurrahman Paşa Vakıflarının mütevellisi Râşid Bey’in vefatıyla evlad-ı vâkıfdan Süleyman Faik Efendi’nin kaymakam tayin edilmesi Ali, nasb-ı kāimmakām Numara: 15, 80 guruş Nezâret-i Haremeyn-i Muhteremeyn’e mülhak evkāfdan Sadr-ı esbak Dâmâd Melek Paşa ve halîlesi Zeyneb Sultan ve Âişe Hanım ve ceddi Abdurrahman Paşa vakıflarının bi’l-meşrûta ve bâ-berât-ı âlî mütevellîsi Râşid Bey bundan akdem fevt ve tevliyât-ı mezkûre mahlûle olup evlâd-ı vâkıfdan Leyla ve Aliyye Kerem hanımlardan herbiri tevliyât-ı mezkûrenin meşrûtün-lehâları olduklarını iddi‘â ile terâfu‘ları rü’yet olunmakda olduğundan meşrûtün-lehâsı tahakkuk ederek tevcîh olununcaya değin evkāf-ı müşârün-ileyhin umûr-ı lâzımesini idâre ve rü’yete bir kāimmakām nasbı lâzım ve mühim olmağın emîn ve müstakīm ve her vechile tevliyet uhdesinden gelmeğe kādir idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan evlâd-ı vâkıf-ı müşârün-ileyhden ve müderrisîn-i kirâmdan işbu bâ‘isü’l-kitâb mekremetlü Süleyman Faik Efendi b. el-müteveffâ Râşid Bey kıbel-i şer‘den evkāf-ı müşârün-ileyhime kāimmakām nasb ü ta‘yîn oldukda ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 23 Zilhicce sene [1]300 Şühûdü’l-hâl: Adliye hulefâsından Ali Bey b. Ebulhayr, Mahkeme-i Teftîş ketebesinden Sıddık Efendi b. Emin ve gayruhum.