Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 125 Hüküm no: 81 Orijinal metin no: [54-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı esnafından Yordan v. Yeratmos’un ölümüyle küçük çocuklarına intikal eden gedik hisselerinin diğer vârislerin hisseleriyle birlikte satışı için Yeratmos v. Vasil’e vekâlet verilmesi Cemal, isbât-ı vekâlet: 1 kıt‘a Numara: 63, 40 guruş Fi’l-asl Konya vilâyeti dâhilinde Niğde sancağında Arapsun kazâsı ahâlisinden olup Galata’da Yeni Câmi‘ mahallesinde sâkin iken bundan akdem fevt olan Devlet-i Aliyye teba‘asının Rum milletinden Havyarcı esnâfından Yordan v. Yeratmos v. Hıristo’nun sulbî sagīr oğlu Nikola ve sulbiye sagīre kızları Mariko ve Azafiye’nin? anaları ve tesviye-i emrlerine bâ-hüccet-i şer‘iye vasîyy-i mansûbeleri karye-i mezkûrede sâkine teba‘a-i merkūme nisvânından Likri? bt. Mina v. Atam ve sadriye kebîre kızı karye-i mezkûrede sâkine teba‘a-i merkūme nisvânından Zaharo ve taraflarından ber-vech-i âtî vekâlet iddi‘â eden teba‘a-i merkūmeden Yeratmos v. Vasil v. Nikola m. zikri âtî gedik âlâtı hissesine bi’l-emâne vaz‘-ı yedi mütehakkık olan teba‘a-i merkūmeden Vasil v. Petro muvâcehesinde üzerine da‘vâ ve takrîr-i kelâm edüp Galata’da Balıkpazarı Kapısı hâricinde Yeni Câmi‘ mahallesinde Haci Noti? sokağında on numara ile murakkam bir bâb havyarcı dükkânı derûnunda mevcûde Hazîne-i Haremeyn-i Muhteremeyn Evkāfı müstegallâtından gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on sehm hisse-i şâyi‘ası müteveffâ-yı merkūm Hacı Yordan’ın sağlığında bâ-temessük-i nizâm bi’l-icâreteyn taht-ı tasarrufunda olup ba‘de fevtihî vasîleri olduğum sıgār-ı merkūmûn ile gāibe-i merkūme Zahar ve sulbî kebîr oğulları gāibân ani’l-meclis Dimitri ve Yeratmos’a hasbe’l-âde intikāl edüp merkūm Vasil hisse-i mezkûreden sıgār-ı merkūmûn ile gāibe-i merkūme Zahar’ın dört südüs hisselerine gāibe-i merkūme Zahar âlât-ı gedik-i mezkûrda olan hissesini âhara ferâğ murâd edüp sıgār-ı merkūmunun hisseleri kalîl olarak uhdelerinde ibkāsı [55] haklarında muzır ve gayr-ı müfîd olmağla sıgār-ı merkūmûnun hisseleri dahi kebîre-i merkūmenin hissesiyle ma‘an bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunmak sıgār-ı merkūmûn haklarında her vechile enfa‘ ve evlâ olduğuna binâen vasîyy-i gāibe-i merkūme âlât-ı gedik-i mezkûrdan sıgār-ı merkūmûnun hisselerini gāibe-i merkūme Zaharo’nun hissesiyle ma‘an bedel-i misliyle bâ-re’y-i mütevellî âhara ferâğa kıbel-i şer‘den izin talebine ve ba‘de’l-izn bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Şevvâli’l-mükerreminin on birinci günü târihiyle müverraha Arapsun kazâsı nâibi es-Seyyid İsmail Hakkı Efendi’nin imzâ ve hâtemini hâviye bir kıt‘a vekâlet hücceti ve ve zahrında muharrer kazâ-i mezkûr Bidâyet Mahkemesi’nin mazbatası mantûklarınca mahkeme-i mezkûrede nâib-i mûmâ-ileyh huzûrunda vasîyy-i merkūme Likri? ve bint-i merkūme Zaharo’dan herbiri bi’l-vesâye ve bi’l-emâne taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup on sehm âlât-ı gedik-i mezkûrun dört südüs hissesinden keff-i yed ve bana teslîme merkūme Vasil’e tenbîh olunmak murâdımdır dedikde gıbbe’s-suâl ol dahi cevâbında on sehm âlât-ı gedik-i mezkûrun dört südüs hissesi sıgār-ı merkūmûn ile gāibe-i merkūme Zaharo’nun ber-minvâl-i muharrer intikālen bi’l-icâreteyn tasarruflarında olup kendüsü dahi hisse-i mezkûreye gāibe-i vasîyy-i merkūme ile gāibe-i merkūme Zaharo’nun teslîmleriyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun ber-vech-i muharrer vekâlet müdde‘âsını ba‘de’l-inkâr hüccet ve mazbata-i mezkûrlar mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâneden hâmişine tahşiye olunduğuna ve me‘âli müdde‘î-i merkūmun takrîr-i meşrûhuna mutâbık ve mazbata-i mezkûre dahi hüccet-i mezkûreyi müeyyid ve musaddık bulunduğuna binâen hüccet-i mezkûre tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm ve’t-tenbîh Galata’da havyarcı esnâfı kethudâsı tarafından i‘tâ olunan memhûr bir kıt‘a ilmühaber mantûkunca sıgār-ı merkūmûnun on sehm hisse-i âlât-ı gedik-i mezkûrda bir kıt‘a temessükle beş sehm hissesinde olan üç südüs hisse-i şâyi‘aları mu‘ahharan tâlibi zuhûrunda ferâğ olunmak üzere şimdilik uhdelerinde bi’l-ibkā mâ‘adâ diğer bir kıt‘a temessükle ancak beş sehm hissesinde olan üç südüs hisse-i şâyi‘aları bundan akdem lede’l-müzâyede ve gıbbe inkıtâ‘i’r-rağbe el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yedi bin guruş mukābelesinde bâ-re’y-i mütevellî âhara ferâğa kıbel-i şer‘den müvekkilesi vasîyy-i gāibe-i merkūmeye izâfetle vekîl-i merkūm Yeratmos’a izin verilmeğin mâ-vaka‘a bi’t-taleb ketb olundu. Fî 22 Zilhicce sene 1300 Şühûdü’l-hâl: ( )