Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 127 Hüküm no: 82 Orijinal metin no: [55-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kotini bt. Gavril’e ait ev, dükkân ve gedik hisselerine el koyan Kozima v. Toma’dan hisselerin geri alınması için Gülüstanoğlu Yeratmos’a vekâlet verilmiş olduğu Cemal, isbât-ı vekâlet Numara: 2, 40 guruş Konya vilâyet-i celîlesi dâhilinde Niğde sancağına tâbi‘ Nevşehir kazâsı kurâsından Meleköyü karyesinde sâkine Devlet-i Aliyye teba‘asının Rum milleti nisvânından Kotini bt. Gavril v. Angeli’nin zevci olup tarafından ber-vech-i âtî vekâlet iddi‘â eden teba‘a ve millet-i merkūmeden ve Dersaâdet’de Balıkpazarı’nda sâkin bakkāl esnâfından işbu bâ‘isü’r-rakīm Gülüstanoğlu Yeratmos v. Todori m. zikri âtî dükkân ve menzil ve gedik âlâtı hisselerine bi’l-emâne vaz‘-ı yedi mütehakkık olan kezâlik teba‘a ve millet-i merkūmeden Kozima v. Toma muvâcehesinde üzerine da‘vâ ve takrîr-i kelâm edüp esbak gümrük emîni merhûm Hasan Ağa Vakfı musakkafâtından mahrûse-i Galata’ya muzâfe kasaba-i Kasımpaşa’da Asmalı Mescid civârında Sarı Lütfi mahallesinde Sofyalı sokağında vâki‘ dokuz ve on bir numaralar ile murakkam ma‘lûmü’l-hudûd ve’l-müştemilât şehriye on akçe icâre-i müeccelelü fevkınde bir bâb menzili müştemil bir bâb bakkāl dükkânı ve dükkân-ı mezkûr derûnunda mevcûde cennet-mekân Gāzi Sultan Mahmud Hân-ı sânî -tâbe serâhû- Hazretleri Evkāf-ı celîleleri müstegallâtından beyne’l-esnâf gedik ta‘bîr olunur yevmî altı akçe icâre-i müeccelelü âlât-ı lâzıme-i ma‘lûmeden herbirinin südüsden sülüs hisse-i şâyi‘aları gāibe-i merkūmenin bâ-temessükât-ı mütevellî ve nizâm bi’l-icâreteyn taht-ı tasarrufunda ve merkūm Kozima hısas-ı şâyi‘a-i mezkûrelere gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer mutasarrıfa olduğu hısas-ı şâyi‘a-i mezkûreleri merkūmun yedinden nez‘ ü kabza ve ba‘de’l-kabz bedel-i misilleri ve mütevellîleri re’yleriyle âhara [56] ferâğa ve bedellerini ahz ü kabza ve makbûzumu kendüye irsâl ü îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Zilka‘deti’ş-şerîfesinin dördüncü günü târihiyle müverraha kazâ-i mezkûr nâibi Hafız Süleyman Efendi’nin imzâ ve hâtemini hâviye bir kıt‘a vekâlet hücceti ve hüccet-i mezkûre zahrında muharrer Konya Bidâyet Mahkemesi’nin memhûr bir kıt‘a mazbatası mantûkunca kazâ-i mezkûr mahkemesinde nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hısas-ı şâyi‘a-i mezkûrelerden keff-i yed ve vech-i lâyıkıyla bana teslîme merkūm Kozima’ya tenbîh olunmak bi’l-vekâle matlûbumdur dedikde gıbbe’s-suâl merkūme Kozima dahi cevâbında hısas-ı şâyi‘a-i mezkûreler gāibe-i merkūmenin bi’l-icâreteyn taht-ı tasarrufunda ve kendüsü dahi ber-minvâl-i muharrer bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûreler mütâla‘a olundukda hüccet-i mezkûrenin mühr[ü] mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğuna ve mazmûnu vekîl-i merkūmun takrîr-i meşrûhuna muvâfık ve mazbata-i mezkûre dahi hüccet-i mezkûreyi müeyyid ve musaddık bulunduğuna binâen zikr olunan hüccet-i şer‘iyenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu misillü tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm hısas-ı şâyi‘a-i mezkûrelerden keff-i yed ve vech-i lâyıkıyla müdde‘î-i merkūm Yeratmos’a teslîme merkūm Kozima’ya tenbîh olunmağın mâ-vaka‘a bi’t-taleb ketb olundu. Fî 17 Zilhicce sene [1]300 Şühûd[ü’l-hâl]: ( )