Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 129 Hüküm no: 83 Orijinal metin no: [56-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Dede Efendi’nin vefatıyla küçük oğlu Hasan’a intikal eden ev hissesinin satışına izin verilmesi Tevfik, izin: 1 kıt‘a Numara: 57, 67,5 guruş Mahmiye-i İstanbul’da Mollagürânî mahallesinde sâkin iken bundan akdem vefât eden İsmail Dede Efendi b. Ahmed’in sulbî sagīr oğlu Hasan’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isetü’l-kitâb Emine Hanım bt. Abdullah m. bi’l-vesâye takrîr-i kelâm edüp Haremeyn-i Şerîfeyn -şerrefehümullâhu te‘âlâ fi’d-dâreyn- Evkāfı musakkafâtından mahalle-i mezkûrede kâin ma‘lûmü’l-hudûd ve’l-müştemilât dokuz numara ile murakkam şehriye on yedi akçe icâre-i müeccelelü bir bâb menzilin dört hisse i‘tibârıyla rub‘ hisse-i şâyi‘ası müteveffâ-yı mezbûr İsmail Dede intikālinden sagīr-i mezbûr Hasan’ın iki kıt‘a temessükle bi’l-icâreteyn taht-ı tasarrufunda olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan rub‘ hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye’den i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin guruş ve nef‘an li’l-yetîm zam olunan kezâlik lira-yı Osmânî yüz guruş hesâbıyla bin beş yüz guruş ki cem‘an dört bin beş yüz guruş mukābelesinde âhara ferâğa izin taleb şüd. Fî 12 Muharrem sene [1]300 Şühûd[ü’l-hâl]: Muhzır Mehmed Ağa b. Mustafa, Nuri Ağa b. ( ) ve gayruhum.