Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 130 Hüküm no: 84 Orijinal metin no: [57-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuruçay kazası Armudan-ı Kebir köyünden bazı şahısların Hamparsum v. Kigork tarafından el konulan değirmen arsası hisselerini almak üzere Artin v. Sahak’ı vekil tayin etmiş oldukları Aziz Efendi, isbât-ı vekâlet: 1 kıt‘a Numara: 61, 40 guruş Erzurum vilâyeti dâhilinde Kuruçay kazâsı kurâsından Armudan-ı Kebîr karyesinde mütemekkinler herbiri Devlet-i Aliyye teba‘asının Ermeni milletinden Ohan ve millet-i merkūme nisvânından Toran? ve Tışhohi? evlâd-ı el-müteveffâ Uncu Bedros v. Haçador ve kezâlik teba‘a-i Devlet-i Aliyye’den ve millet-i merkūmeden Begos ve karındaşı teba‘a ve millet-i merkūmeden Karakin veledân-ı Hamparsum v. Begos taraflarından ber-vech-i âtî vekâlet iddi‘â eden teba‘a-i Devlet-i Aliyye’den ve millet-i [merkūmeden] işbu hâmilü’r-rakīm Artin v. Sahak m. zikri âtî arsa hissesine bi’l-emâne vaz‘-ı yedi mütehakkık olan yine teba‘a-i Devlet-i Aliyye’den ve millet-i merkūmeden Hamparsum v. Kigork muvâcehesinde üzerine da‘vâ ve takrîr-i kelâm edüp İstanbul’da Balatkapısı dâhilinde Hızır Çavuş mahallesinde Debbâğzâde sokağında vâki‘ ma‘lûmü’l-hudûd beş numara ile murakkam vakf-ı âharla mahlût bir kıt‘a değirmen arsasının nezâret-i Haremeyn-i Muhteremeyn’e mülhak evkāfdan defterdâr-ı esbak merhûm Sadullah Efendi Vakfı’ndan olan şehriye dört yüz elli akçe icâre-i müeccelelü mu‘ayyen mahâllinin sülüs hisse-i şâyi‘ası babaları müteveffâ-yı merkūm Bedros v. Haçador intikālinden gāibûn-ı merkūmûn Ohan ve Toran? ve Tışhohi? ile diğer li-ebeveyn kız karındaşları müteveffât Eskohi’nin sağlığında âdiyen bi’l-icâreteyn taht-ı tasarruflarında iken merkūme Eskohi’nin fevtiyle sülüsden rub‘ hissesi evlâd-ı gāibân-ı merkūmân Begos ve Karakin’e münâsafeten intikāl edüp ol-vechile mahâll-i mezkûrun sülüsden üç rub‘ hissesi gāibûn-ı merkūmûn Ohan ve Toran? ve Tışhohi’nin? ve sülüsden rub‘ hissesi dahi gāibân-ı merkūmân Begos ve Karakin’in âdiyen bi’l-icâreteyn taht-ı tasarruflarında ve merkūm Hamparsum hisse-i mezkûreye gāibûn-ı merkūmûnun teslîmleriyle bi’l-emâne vâzı‘ü’l-yed olup ancak gāibûn-ı merkūmûn Ohan ve Toran? ve Tışhohi? ve Begos ve Karakin’den herbiri intikālen mutasarrıf oldukları sülüs hisse-i şâyi‘a-i mezkûrelerini merkūm Hamparsum’un yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup bin iki yüz doksan dokuz senesi şehr-i Ramazani’l-mübârekinin gurresi târihiyle müverraha kazâ-i mezkûr nâibi es-Seyyid Hafız Halil Fethi Efendi’nin imzâ ve hâtemini hâviye bir kıt‘a vekâlet hücceti ve zahrında muharrer Erzincan Sancağı Bidâyet Mahkemesi’nin memhûr mazbatası mantûklarınca mahkeme-i mezkûrede nâib-i mûmâ-ileyh huzûrunda taraflarından beni vekâlet-i mutlaka-i sahîha-i şer‘iye ile bi’l-muvâcehe vekîl nasb ü ta‘yîn eylediklerinde ben dahi vekâlet-i mezkûreyi kabûl etmemle suâl olunup hisse-i mezkûreden keff-i yed ve bana teslîme merkūm Hamparsum’a tenbîh olunmak bi’l-vekâle murâdımdır deyü hüccet-i mezkûreyi ibrâz ile da‘vâ etdikde ol dahi cevâbında hisse-i mezkûreye ber-minvâl-i muharrer bi’l-emâne vaz‘-ı yedini ikrâr edüp lâkin müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûreler dahi mütâla‘a olundukda hüccet-i mezkûrenin mühr[ü] mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve mazmûnu müdde‘î vekîl-i merkūmun takrîr-i meşrûhuna muvâfık ve mazbata-i mezkûre dahi hüccet-i mezkûreyi müeyyid ve musaddık olarak şübhe-i tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle şübhe-i tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz ve mu‘teber olmağla mûcebince müdde‘î-i merkūmun vekâletine ba‘de’l-hükm hisse-i mezkûreden keff-i yed ve müdde‘î vekîl-i merkūm Artin’e teslîme merkūm Hamparsum’a tenbîh olunmağın mâ-vaka‘a bi’t-taleb ketb olundu. Fî 8 Zilhicce sene [1]300 Şühûd[ü’l-hâl]: Mehmed Ağa b. Mustafa, Ömer Ağa b. Kadri ve gayruhum.