Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 131 Hüküm no: 85 Orijinal metin no: [57-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanyalı Hıristo’nun ölümüyle küçük oğlu Nikola’ya annesi Marya’nın vasi tayin edilmesi Hakkı, nasb-ı vasî Numara: ( ), bilâ-harc Hudâvendigâr-ı esbak cennet-mekân Sultan Ahmed Hân-ı evvel -tâbe serâhû- hazretlerinin evkāf-ı şerîfeleri beytü’l-mâl hudûdu dâhilinde mahrûse-i Galata’da Kemankeş Karamustafapaşa mahallesinde Şerbethâne sokağında vâki‘ on altı numaralı bir bâb menzilde sâkin iken bundan akdem fevt olan Devlet-i Aliyye teba‘asının Rum milletinden Yanyalı Hıristo v. Vasil v. Hıristo’nun sulbî oğlu tahmînen altı yaşında Nikola’nın vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın mu‘temedü’l-hâl olarak her vechile vesâyet uhdesinden gelmeğe kādire idiği zeyl-i vesîkada muharrerü’l-esâmî kimesneler haberleriyle zâhir ve mütehakkık olan sagīr-i mezbûrun vâlidesi teba‘a-i Devlet-i Aliyye’nin millet-i merkūmesi nisvânından işbu bâ‘isetü’l-vesîka Marya bt. Nikola sagīr-i mezbûrun vakt-i rüşd ü sedâdına değin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eylediğini Mahkeme-i Teftîş Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî-selhi Zilhicce sene [1]300 Şühûdü’l-hâl: Ömer Ağa b. Kadri, Mehmed Ağa b. Mustafa, Mıgırdıç v. Artin v. Maksur, Aleksi v. Eseni v. Yuvakim ve gayruhum.