Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 132 Hüküm no: 86 Orijinal metin no: [58-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan İsmail Ağa’nın vefatıyla küçük oğlu İbrahim Şevket’e intikal eden bostan ve gedik hissesinin satışına izin verilmesi Küçük İbrahim, izin: 1 kıt‘a Numara: 44, 150 guruş Medîne-i Üsküdar’da Torbalı mahallesinde sâkin iken bundan akdem vefât eden Bağçevân esnâfından İsmail Ağa b. Mehmed’in sulbî sagīr oğlu İbrahim Şevket’in vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe işbu bâ‘isetü’l-kitâb Fâtımatü’z-zehra Hanım bt. Hasan m. bi’l-vesâye takrîr-i kelâm ve ta‘bîr ani’l-merâm edüp medîne-i mezkûrede Solak Sinan mahallesinde vâki‘ Bülbülderesi Bostanı demekle arîf el-yevm derûnunda bir bâb kalaycı ve bir bâb kahve ve bir bâb ahur ve bir bâb bekâr odasını müştemil yüz otuz dört numara ile murakkam bir kıt‘a bostan derûnunda mevcûde Hudâvendigâr-ı esbak cennet-mekân-ı adn-âşiyân Gāzi Sultan Mehmed Hân-ı sânî -tâbe serâhû- Hazretlerinin Evkāf-ı celîleleri müstegallâtından gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yevmî iki akçe ve bir rub‘ akçe icâre-i müeccelelü otuz sehm hissesi müteveffâ-yı mezbûrun vâlidesi müteveffât Âişe Hanım bt. Ahmed’in hayatında bâ-temessük-i nizâm bi’l-icâreteyn taht-ı tasarrufunda iken mezbûre Âişe Hanım medîne-i mezkûrede Ahmed Çelebi mahallesinde vefât eden Debbâğ Mehmed Efendi b. Osman’ın sulbî sagīr oğlu Osman ve sulbiye sagīre kızı Âişe’nin mâllarından ve vasîyy-i muhtârları Mahmud Aziz b. Ömer yedinden istidâne ve kabz eylediği altı bin guruş deyni mukābelesinde otuz sehm âlât-ı gedik-i mezkûru sagīrân-ı mezbûrâna bâ-re’y-i mütevellî vefâen ferâğ ve tefvîz eyledikden sonra sagīre-i mezbûre Âişe verâseti vâlidesi Şerife Cemile Hanım bt. Mehmed Emin ve li-ebeveyn er karındaşı sagīr-i mezbûr Osman ve li-ümmin er karındaşı sagīr Halil’e münhasıra olduğu hâlde vefât etmekle ümm-i mezbûre Şerife Cemile Hanım ile sagīr-i mezbûr Halil’in deyn-i merkūmdan hisseleri mâl-ı âhardan istifâ olunarak meblağ-ı merkūm altı bin guruş kâmilen Osman’ın hissesine ta‘yîn olundukdan sonra sagīr-i mezbûr Osman dahi bundan akdem isbât-ı rüşd ederek meblağ-ı mezkûru medyûne-i mezbûre Âişe Hanım’dan huzûr-ı şer‘de tamamen ahz ü kabz eylediğini tâyi‘an ikrâr ü i‘tirâf edüp otuz sehm âlât-ı gedik-i mezkûrun bâ-re’y-i mütevellî fekkinin icrâsı içün bin iki yüz doksan yedi senesi Cemâziyelevvel’inin beşinci günü târihiyle medîne-i mezkûre mahkeme-i şer‘iyesinden bir kıt‘a ilmühaber verilmiş ise de kable’l-fek ve’t-tahlîs mezbûre Âişe Hanım’ın dahi fevtiyle otuz sehm âlât-ı gedik-i mezkûr sadrî sagīr oğlu müteveffâ-yı mezbûr İsmail Ağa’ya ba‘de’l-intikāl ânın dahi ber-vech-i muharrer fevtiyle sagīr-i mezbûr İbrahim Şevket ile sulbiye kebîre kızı Âişe Hanım’a münâsafeten intikāl edüp lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye eşedd-i ihtiyâcı olmağla sagīr-i mezbûrun otuz sehm âlât-ı gedik-i mezkûrdan olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Dokuzuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun otuz sehm âlât-ı gedik-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bin guruş yirmi para mukābelesinde bâ-re’y-i mütevellî âhara ferâğa izin taleb şüd. Fî 5 Muharrem sene [1]301 Şühûd[ü’l-hâl]: Vâlide Sultan Câmi‘-i şerîfi kayyumlarından Râşid Efendi b. Mehmed, Mahkeme-i mezbûr muhzırlarından Musa Ağa b. el-Hâc Ebûbekir b. İsmail ve gayruhum.