Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 133 Hüküm no: 87 Orijinal metin no: [59-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despina bt. Paleni’nin hayvarcı bakkal gediğine el koyan İstefan v. Yorgi’den gediği almak üzere kardeşi Yorgi’yi vekil tayin etmesi Mehmed Necib, vekâlet Numara: 74, 40 guruş Konya vilâyeti dâhilinde Niğde sancağına tâbi‘ Nevşehir mahallâtından Hıristiyan mahallesinde sâkine Devlet-i Aliyye teba‘asının Rum milleti nisvânından Despina bt. Paleni v. Serandi’nin li-ebeveyn er karındaşı olup tarafından ber-vech-i âtî vekâlet iddi‘â eden teba‘a ve millet-i merkūmeden işbu bâ‘isü’r-rakīm Yorgi m. zikri âtî havyarcı bakkāl gediği hissesine bi’l-emâne vaz‘-ı yedi mütehakkık olan kezâlik teba‘a ve millet-i merkūmeden İstefan v. Yorgi muvâcehesinde üzerine da‘vâ ve takrîr-i kelâm edüp mahmiye-i İstanbul’da Balıkpazarı kurbünde Şeyh Mehmed Geylanî mahallesinde vâki‘ ma‘lûmü’l-hudûd yüz kırk üç numara ile murakkam bir bâb bakkāl dükkânı derûnunda mevcûde Hazîne-i Haremeyn-i Muhteremeyn Evkāfı müstegallâtından beyne’l-esnâf havyarcı gediği ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla şehriye on beş buçuk akçe icâre-i müeccelelü on sehmden sülüs hisse-i şâyi‘ası karındaşım gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-minvâl-i muharrer mutasarrıfa olduğu hisse-i mezkûreyi merkūmun yedinden nez‘ ve kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine işbu yedimde olup bin iki yüz doksan dokuz senesi Zilhicceti’ş-şerîfesinin on dokuzuncu günü târihiyle müverraha medîne-i mezkûre nâibi Hafız Süleyman Efendi’nin imzâ ve hâtemini hâviye bir kıt‘a vekâlet hücceti ve zahrında muharrer medîne-i mezkûre Bidâyet Mahkemesi’nin memhûr mazbatası mûceblerince mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûreden keff-i yed ve vech-i lâyıkıyla bana teslîme merkūm İstefan’a tenbîh olunmak bi’l-vekâle matlûbumdur dedikde gıbbe’s-suâl merkūm İstefan dahi cevâbında hisse-i şâyi‘a-i mezkûre gāibe-i merkūmenin ber-vech-i muharrer bi’l-icâreteyn taht-ı tasarrufunda olup kendüsü dahi gāibe-i merkūmenin teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr etmekle zikr olunan hüccet ve mazbata mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr olunduğu ve mazmûnu müdde‘î-i merkūmun takrîr-i meşrûhuna muvâfık bulunduğu ve mazbata-i mezkûre dahi hüccet-i mezkûreyi musaddık ve müeyyid olarak tezvîr ve tasnî‘den sâlim [olduğu] münfehim ve Mecelle-i Ahkâm-ı Adliye’nin bin sekiz yüz yirmi birinci bendi mûcebince bu misillü tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm hisse-i şâyi‘a-i mezkûreden keff-i yed ve müdde‘î vekîl-i merkūm Yorgi’ye teslîme merkūm İstefan’a tenbîh olunmağın mâ-vaka‘a bi’t-taleb ketb olundu. Fî 13 Muharrem sene [1]301 Şühûd[ü’l-hâl]: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.