Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 134 Hüküm no: 88 Orijinal metin no: [59-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Reşid olmayan Hacer Maksude Hanım’a ait ev ve fırın hisselerinin vasisi tarafından satışına izin verilmesi Kādızâde Mehmed, izin: 1 kıt‘a Numara: 22, 292,5 guruş Mahmiye-i İstanbul’da Eski Ali Paşa kurbünde Akşemseddin mahallesinde sâkine gayr-ı reşîde Hacer Maksude Hanım bt. Aziz Mahmud Efendi’nin li-ebeveyn er karındaşı ve tesviye-i umûruna bâ-hüccet-i şer‘iye vasîyy-i mansûbu işbu bâ‘isü’l-kitâb Mahmud Edib Efendi m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan Sabuncu zevcesi merhûme Hadice Hatun Vakfı musakkafâtından mahalle-i mezbûrede kâin ma‘lûmü’l-hudûd ve’l-müştemilât iki kıt‘a temessük mantûklarınca şehriye cem‘an elli akçe icâre-i müeccelelü tahtında fırını müştemil bir bâb menzilin nısf hissesi gayr-ı reşîde-i mezbûrenin bi’l-icâreteyn taht-ı tasarrufunda olup lâkin menzil ve fırın-ı mezkûrlar mürûr-ı eyyâm ile ânen fe-ânen müşrif-i harâb olarak hâsılı harcına vefâ etmeyip bekāsı gayr-ı reşîde-i mezbûre hakkında muzır ve gayr-ı müfîd olduğundan mâ‘adâ gayr-ı reşîde-i mezbûre nafaka ve kisveye eşedd-i ihtiyâc ile muhtâc olmağla gayr-ı reşîde-i mezbûrenin menzil ve fırın-ı mezkûrlarda olan hisse-i mezkûrları bedel-i misliyle bâ-re’y-i mütevellî âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak gayr-ı reşîde-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca gayr-ı reşîde-i mezbûrenin menzil ve fırın-ı mezkûrlarda olan nısf hisse-i şâyi‘aları bundan akdem lede’l-müzâyede ve ba‘de’l-keşf [60] el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on dokuz bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 18 Zilhicce sene [1]300 Şühûd[ü’l-hâl]: Selim Ağa b. Ahmed, Latif Ağa b. Abdullah ve gayruhum.