Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 135 Hüküm no: 89 Orijinal metin no: [60-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemalifer Hanım’ın vefatıyla küçük oğlu Mehmed Halid’e intikal eden arsanın satışına izin verilmesi Küçük İbrahim, izin: 1 kıt‘a Numara: 55, 75 guruş Mahmiye-i İstanbul’da Küçük Mustafa Paşa kurbünde Gül Câmi‘-i şerîfi mahallesinde sâkine iken bundan akdem vefât eden Cemalifer Hanım bt. Abdullah’ın sadrî sagīr oğlu Mehmed Halid’in babası ve velîsi olup mahmûdü’l-hâl idiği ihbâr olunan koltukçu esnâfından işbu bâ‘isü’l-kitâb Mehmed Ağa b. Abdullah m. bi’l-velâye takrîr-i kelâm edüp bir kıt‘a Defter-i hâkānî senedi mûcebince merhûm Hoca Osman Efendi Vakfı musakkafâtından mahalle-i mezbûrede Küçük Mustafa Paşa caddesinde vâki‘ doksan bir numara ile murakkam şehriye elli akçe icâre-i müeccelelü bir kıt‘a menzil arsasının nısf hisse-i şâyi‘ası müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihâ sagīr-i mezbûra hasbe’l-âde intikāl edüp lâkin arsa-i mezkûre bî-hâsıl ve etrâfını muhît taş duvarları mürûr-ı eyyâm ile münhedim ve enkāzı telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun arsa-i mezkûrede olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle ma‘an hıfz olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun arsa-i mezkûrede olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin yüz altmış altı guruş bedel mukābelesinde âhara ferâğa izin taleb şüd. Fî 9 Muharrem sene [1]301 Şühûd[ü’l-hâl]: Hasan Ağa b. Abdullah, Kısmet-i askeriye muhzırlarından Ali Rıza Ağa b. Hüseyin ve gayruhum.