Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 136 Hüküm no: 90 Orijinal metin no: [60-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Martaoğlu Anaştaş ile kardeşi Yani’nin Panayot v. İlya tarafından el konulan arsalarını geri almak istemeleri Medîne-i Ankara mahallâtından İmâm Yusuf mahallesinde sâkin Devlet-i Aliyye teba‘asının Rum milletinden Martaoğlu Anaştaş v. İstavri ve li-ebeveyn er karındaşı İngiltere’de kâin Liverpool şehrinde li-ecli’t-ticâre sâkin yine teba‘a-i Devlet-i Aliyye’nin Rum milletinden Yani taraflarından ber-vech-i âtî vekâlet iddi‘â eden teba‘a ve millet-i merkūmeden işbu hâmilü’r-rakīm Dimitri v. Kozima m. zikri âtî arsa hissesine bi’l-emâne vâzı‘ü’l-yed olan Panayot v. İlya muvâcehesinde üzerine da‘vâ ve takrîr-i kelâm edüp Haremeyn-i Muhteremeyn Hazînesi’nden mazbût cennet-mekân Sultan Bâyezid Hân-ı Velî -tâbe serâhû- Hazretleri Evkāf-ı şerîfeleri musakkafâtından Galata’da Beyoğlu’nda Feriköyü’nde Dere caddesinde vâki‘ on yedi numara ile murakkam ma‘lûmü’l-hudûd beher şehr altmış beş akçe icâre-i müeccelelü bir kıt‘a arsanın on altı sehm hissesi gāibân-ı merkūmân Anaştaş ve Yani’nin bâ-temessük-i mütevellî bi’l-icâreteyn taht-ı tasarruflarında ve merkūm Panayot hisse-i mezkûreye gāibân-ı merkūmânın teslîmleriyle bi’l-emâne vâzı‘ü’l-yed olup ancak gāibân-ı merkūmân ber-vech-i muharrer mutasarrıfân oldukları iki sehm arsa-i mezkûreyi merkūm Panayot yedinden nez‘ ü kabza ve ba‘de’l-kabz bedel-i misilleriyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Şa‘bâni’l-mu‘azzamının on ikinci günü târihiyle müverraha medîne-i Ankara nâibi Ömer Hulusi Efendi’nin imzâ ve hâtemini hâviye bir kıt‘a vekâlet hücceti ve zahrında muharrer Ankara Vilâyeti İstînâf Mahkemesi’nin ve gāib-i merkūm Yani’nin imzâsını hâvî bir kıt‘a vekâletnâme mantûklarınca taraflarından beni gāib-i merkūm Anaştaş bi’l-muvâcehe ve diğer gāib-i merkūm Yani dahi gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb u ta‘yîn eylediklerinde ben dahi vekâlet-i mezkûreleri kabûl etmemle suâl olunup iki sehm arsa-i mezkûreden keff-i yed ve bana teslîme merkūm Panayot’a tenbîh olunmak bi’l-vekâle murâdımdır dedikde gıbbe’s-suâl ol dahi cevâbında iki sehm arsa-i mezkûre gāibân-ı merkūmânın ber-vech-i muharrer tasarruflarında olup kendüsü dahi ber-vech-i muharrer bi’l-emâne vâzı‘ü’l-yed olduğunu tâyi‘an ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata ve vekâletnâme-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâne-i celîleden tahşiye ve temhîr olunduğu ve mazmûnu müdde‘î-i merkūmun takrîr-i meşrûhuna muvâfık ve mazbata-i mezkûre dahi hüccet-i mezkûreyi [61 ]müeyyid ve musaddık ve vekâletnâme-i mezkûre dahi Devlet-i Aliyye’nin zikr olunan Liverpool Şehbenderliği tarafından memhûr ve Hâriciye Nezâret-i celîlesinden musaddak olarak hüccet ve vekâletnâme-i mezkûrlar şübhe ve tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu misillü şübhe-i tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince merkūm Dimitri’nin vekâletine ba‘de’l-hükm iki sehm arsa-i mezkûreden keff-i yed ve müdde‘î-i merkūm Dimitri’ye teslîme merkūm Panayot’a tenbîh olunmağın mâ-vaka‘a bi’t-taleb ketb olundu. Fî 7 Muharrem sene [1]301 Şühûd[ü’l-hâl]: ( )