Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 137 Hüküm no: 91 Orijinal metin no: [61-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Telgraf Memuru Selim Efendi’nin vefatıyla küçük oğlu Hasan Tahsin için amcasının kızı Nebiye Hanım’ın vasi tayin edilmesi Mustafa Zühdü, vasî Merhûme ve mağfûrun-lehâ Bezm-i âlem Vâlide Sultan -tâbe serâhû- Hazretlerinin İstanbul’da Yenibahçe’de kâin binâ ve ihyâ buyurdukları hastahânelerinde li-ecli’l-müdâvât sâkin iken bundan akdem vefât eden Telgraf memûru Selim Efendi b. Abbas b. Abdullah’ın sulbî sagīr oğlu Hasan Tahsin Efendi’nin vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın ehil ve müstakīme ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan sagīr-i mezbûrun li-ebeveyn ammi müteveffâ Abdullah’ın sulbiye kızı işbu bâ‘isetü’l-kitâb Nebiye Hanım sagīr-i mezbûrun vakt-i rüşd ü sedâdına değin hıfz-ı emvâliyle tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğini Mahkeme-i Teftîş Beytü’l-mâl kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 5 Muharrem sene [1]301 Şühûdü’l-hâl: Muhzır Ahmed Ağa b. Mustafa, Muhzır Ömer Ağa b. Abdulkadir ve gayruhum.