Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 138 Hüküm no: 92 Orijinal metin no: [61-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahriye kolağalarından Osman Kaptan’ın küçük kızı Hatice Pervere için Hafız Ahmed Efendi’nin vasi tayin edilmesi Salim, nasb-ı vasî Hudâvendigâr-ı esbak cennet-mekân Gāzi Sultan Ahmed Hân-ı Evvel -tâbe serâhû- Hazretlerinin Evkāf-ı şerîfeleri hudûdu dâhilinde Galata’ya muzâfe kasaba-i Kasımpaşa’da Yahya Kethudâ mahallesinde sâkin iken bundan akdem vefât eden Bahriye kolağalarından Osman Kapudan b. Osman b. Abdullah’ın sulbiye mürâhıka kızı tahmînen on altı yaşında Hadice Pervere’nin min-kıbeli’l-üm ceddesi ve tesviye-i umûruna kıbel-i şer‘den vasîyy-i mansûbesi Zeliha Hanım bt. el-Hâc İsmail b. Abdullah bundan akdem vefât etmekle yerine diğer bir vasî nasbü ta‘yîni lâzım ve mühim olmağın mürâhıka-i mezbûrenin min-kıbeli’l-üm hâli olup emîn ve müstakīm ve her vechile vesâyet uhdesinden gelmeğe muktedir idiği zeyl-i kitâbda muharrerü’l-esâmî kimesneler ihbârlarıyla zâhir ve Galata’ya muzâfe kasaba-i Tophâne’de Cihangir mahallesinin imâm ve muhtârlarıyla dört nefer ahâlisinin bi’l-ma‘iyye temhîr eyledikleri der-dest bir kıt‘a ilmühaberden nümâyân olan mahmiye-i İstanbul’da Bahçekapısı nezdinde Hadice Sultan Câmi‘-i şerîfi imâmı işbu bâ‘isü’l-kitâb Hafız Ahmed Efendi b. Ömer Rasih mürâhıka-i mezbûrenin vakt-i rüşd ü sedâdına değin tesviye-i umûruna kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediğini Mahkeme-i Teftîş Beytü’l-mâl kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 11 Muharrem sene [1]301 Şühûdü’l-hâl: Sadâret hademelerinden Tâhir Ağa b. Osman b. Abdullah, Mesci esnâfından el-Hâc Ali Rıza Efendi b. İsmail ve gayruhum.