Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 139 Hüküm no: 93 Orijinal metin no: [62-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pandeli Hıristo’nun vârislerinden hanımı Marya’nın kendisi ile vasisi olduğu oğlu Nikola’nın terekedeki hisselerini almak üzere Vasil v. Yani’yi vekil tayin etmesi el-Hâc Hüsnü, nasb-ı vekîl Numara: ( ), harc: ( ) Cennet-mekân Sultan Ahmed Hân-ı evvel -tâbe serâhû- Hazretlerinin Evkāf-ı şerîfeleri beytü’l-mâl hudûdu dâhilinde Galata’da Kemankeş Karamustafapaşa mahallesinde Şerbethâne sokağında vâki‘ on altı numaralı bir bâb menzilde mütemekkin iken bundan akdem fevt olan Devlet-i Aliyye teba‘asının Rum milletinden Pandeli Hıristo v. Vasil v. Hıristo’nın verâseti ve herbiri teba‘a-i Devlet-i Aliyye’den zevce-i metrûkesi Marya bt. Nikola v. Mihal ve sulbî sagīr oğlu Nikola ile Yanya vilâyeti dâhilinde Koçova’da sâkine sulbiye kebîre kızı Kaliçe’ye? munhasıra olduğu bi’l-ihbâr zâhir ve mütehakkık oldukdan sonra sagīr-i mezbûrun vâlidesi ve tesviye-i umûruna bâ-hüccet-i şer‘iye vasîyy-i mansûbesi şahsı ta‘rîf-i şer‘î ile mu‘arrefe zevce-i merkūme Marya m. yine mahalle-i mezkûrede sâkin Devlet-i Aliyye teba‘asının Rum milletinden Vasil v. Yani v. Dimitri muvâcehesinde takrîr-i kelâm ve ta‘bîr ani’l-merâm edüp ben bu esnâda tebdîl-i hava zımnında Yanya vilâyeti cânibine azîmet edeceğimden mûrisim zevcim müteveffâ-yı merkūmun evkāf-ı beytü’l-mâlı ma‘rifetiyle Mahkeme-i Teftîş’den tahrîr olunan terekesinden benimle vasîsi olduğum oğlum sagīr-i mezbûrun hisse-i irsiyemizi cânib-i beytü’l-mâldan ahz ü kabza ve zikr olunan Kemankeş Kara Mustafa Paşa Vakfı musakkafâtından vâkıf-ı müşârün-ileyhin ismine mensûb mahallede vâki‘ herbiri ma‘lûmü’l-hudûd Beyzâde sokağında otuz dört numaralı bir bâb menzil ve otuz altı numaralı bir bâb mağaza ve kırk numaralı diğer bir bâb mağaza ve kırk iki numaralı diğer bir bâb menzil ve Şerbethâne sokağında on altı numaralı âhar bir bâb menzil ve on sekiz numaralı bir bâb dükkân ve yirmi numaralı diğer bir bâb menzil ve Beyoğlu nâm mahâlde vâki‘ Yenişehir caddesinde yüz on yedi numaralı bir bâb vakıf buzhâne ve derûnunda mevcûde gedik ta‘bîr olunur vakıf âlât-ı lâzıme-i ma‘lûmeden herbirinin rub‘ hisse-i şâyi‘aları zevcim müteveffâ-yı merkūmun bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî oğlum sagīr-i merkūm ile kızım gāibe-i merkūmeye hasbe’l-âde münâsafeten intikāl edüp ancak akārât ve âlât-ı gedik-i mezkûrelerin rub‘ hisse-i şâyi‘alarına Beyoğlu’nda Yenişehir nâm mahâlde sâkin Fabrikacı Kosti v. Goço fuzûlî vaz‘-ı yed eder olmağla akārât-ı mezkûreyi merkūm Kosti’den ve müteveffâ-yı merkūmun zimem-i nâsda olan hukūkunu ashâbından taleb ü da‘vâ ve ahz ü kabza ve makbûzunu bana irsâl ve îsâle ve husûs-ı mezkûr mütevakkıf olduğu umûrun küllîsine tarafımdan merkūm Vasil’i lede’l-hâce tarafından âharı dahi tevkîle mezûn olmak üzere vekâlet-i mutlaka-i sahîha-i şer‘iye ile bi’l-asâle ve bi’l-vesâye vekîl nasb ü ta‘yîn eyledim dedikde ol dahi vekâlet-i mezkûreyi kabûl eylediğini Mahkeme-i Teftîş Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî-selhi Zilhicce sene 1300 Şühûdü’l-hâl: Ömer Ağa b. Kadri, Mehmed Ağa b. Mustafa, Aleksi v. Enesti, Mıgırdıç v. Artin v. Maksur ve gayruhum.