Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 140 Hüküm no: 94 Orijinal metin no: [62-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahrîr-i Emlak İdaresi Müdürü Feyzullah Efendi’nin vefatıyla küçük çocuklarına intikal eden ev hisselerinin satışına izin verilmesi Hayri, izin Numara: 92, 17,5 guruş Mahmiye-i İstanbul’da Horhor kurbünde Baba Hasan İlmi mahallesinde sâkin iken bundan akdem vefât eden Tahrîr-i Emlâk İdâresi müdîri Feyzullah Efendi b. Abdüllatif’in sulbiye sagīre kızı Fatıma’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe Sıddıka Hanım bt. Yusuf m. müteveffâ-yı mûmâ-ileyhin zevce-i uhrâsından mütevellideler diğer sulbiye sagīre kızları Atiye ve Zekiye’nin tesviye-i umûrlarına kezâlik bâ-hüccet-i şer‘iye vasîyy-i mansûbları Hükûmet-i Mısra? Şifâ-yı Umûmiye müdîr vekîli izzetlü Hasan Nureddin Bey b. el-merhûm Mehmed Nureddin Bey tarafından husûs-ı âtîde der-dest olup iki yüz doksan yedi senesi Şevvâli’l-mükerreminin yirmi birinci günü târihiyle müverraha ve Ahîçelebi Mahkemesi nâibi fazîletlü Musa Kâzım Efendi’nin imzâ ve hâtemini hâviye bir kıt‘a hüccet-i şer‘iye mantûkunca vekîli olup lede’l-iktizâ tarafından âharı tevkîle mezûn olan hükûmet-i müşârün-ileyhâ kapıkethudâsı atûfetlü Mahmud Aziz Beyefendi b. el-merhûm Muhtâr Efendi’nin der-dest olup iki yüz doksan dokuz senesi Teşrîn-i sânînin on beşinci günü târihiyle müverraha ve mührüyle memhûr bir kıt‘a vekâlet senedi mantûkunca kezâlik husûs-ı âtîde vekîl olduğu izzetlü el-Hâc Mahmud Efendi b. Mustafa ve Hurşid Efendi b. Abdullah nâm kimesneler haberleriyle zâhir olan Evkāf-ı Hümâyûn Nezâret-i celîlesi mühürdâr-ı sâbıkı izzetlü Abdullah Efendi b. Mustafa hâzır olduğu hâlde bi’l-vesâye ve bi’l-vekâle takrîr-i kelâm ve ta‘bîr ani’l-merâm edüp merhûm Helvacıbaşı İskender Ağa Vakfı’na mülhak merhûm Kâtib Hüseyin Efendi Vakfı musakkafâtından mahalle-i mezbûrede Kırktulumba sokağında kâin ma‘lûmü’l-hudûd ve’l-müştemilât on dört numara ile murakkam iki kıt‘a temessük mantûklarınca şehriye altmış yedi buçuk akçe icâre-i müeccelelü bir bâb menzil müteveffâ-yı mûmâ-ileyhin [63] hayatında bi’l-icâreteyn taht-ı tasarrufunda olup ba‘de vefâtihî sagīrât-ı mezbûrât ile sulbiye kebîre kızı Hadice Nadire Hanım’a hasbe’l-âde irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrât-ı mezbûrât haklarında muzır ve gayr-ı müfîd olduğundan mâ‘adâ sagīrât-ı mezbûrâtın nafaka ve kisveye eşedd-i ihtiyâçları olmağla sagīrât-ı mezbûrâtın menzil-i mezkûrda olan üç rub‘ hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrât-ı mezbûrât haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrât-ı mezbûrâtın menzil-i mezkûrda olan üç rub‘ hisse-i şâyi‘a-i mezkûrları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bir bin üç yüz yirmi beş guruş mukābelesinde âhara ferâğa izin taleb şüd. Fî 27 Muharrem sene [1]301 Şühûd[ü’l-hâl]: el-Hâc Mahmud Ağa b. Mustafa, Süleyman Ağa b. el-Hâc Refik ve gayruhum.