Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 141 Hüküm no: 95 Orijinal metin no: [63-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şuşanyan Ohannes’in oğlu ve vekili olan Artin’in, Simon v. Agop tarafından el konulan babasına ait arsaları geri almak istemesi el-Hâc Esad, vekâlet: 1 kıt‘a Numara: 114, 40 guruş Medîne-i Tekfurdağı’nda Dilan? mahallesinde mütemekkin teba‘a-i Devlet-i Aliyye’nin Ermeni milletinden Şuşanyan Ohannes v. Bedros v. Atam tarafından ber-vech-i âtî vekâlet iddi‘â eden sulbî kebîr oğlu işbu bâ‘isü’s-sifr teba‘a-i müşârün-ileyhânın millet-i merkūmesinden Artin m. zikri âtî iki kıt‘a arsaya bi’l-emâne vaz‘-ı yedi mütehakkık olan yine teba‘a-i müşârün-ileyhânın millet-i merkūmesinden Simon v. Agop muvâcehesinde üzerine da‘vâ ve takrîr-i kelâm edüp Hazîne-i Evkāf-ı Hümâyûn’dan mazbût evkāfdan cennet-mekân firdevs-âşiyân Sultan Selim Hân-ı kadîm -tâbe serâhû- Hazretleri Evkāfı müstegallâtından Kādı karyesinde Cafer Ağa mahallesinde Ceviz sokağında yirmi iki numara ile murakkam ma‘lûmü’l-hudûd şehriye üç yüz altmış akçe mukāta‘alu terbî‘an beş yüz seksen bir zirâ‘ müfrez bir kıt‘a arsa ve ittisâlinde vâki‘ tahmînen on beş zirâ‘ diğer bir kıt‘a arsadan herbiri babam gāib-i merkūm Ohannes’in bâ-temessükât-ı mütevellî bi’l-icâreteyn taht-ı tasarrufunda ve merkūm Simon arsa-i mezkûrlara gāib-i merkūmun teslîmiyle bi’l-emâne vâzı‘ü’l-yed olup ancak gāib-i merkūm ber-vech-i muharrer mutasarrıf olduğu arsa-i mezkûrelerden terbî‘an beş yüz seksen bir zirâ‘ arsayı merkūmun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî tâlibine ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Muharremi’l-harâmının on birinci günü târihiyle müverraha medîne-i mezkûre nâibi Arabzâde Mehmed Nurullah Neşet Efendi’nin imzâ ve hâtemini hâviye olup mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden hâmişine tahşiye ve temhîr olunan bir kıt‘a vekâlet hücceti nâtıka olduğu üzere târih-i mezkûrda nâib-i mûmâ-ileyh tarafından me’zûnen mürsel Mahkeme-i Şer‘iyye Başkâtibi Ali Zühdü Efendi b. Hacı Hasan Efendi’nin mezkûr Dilan? mahallesinde vâki‘ babam gāib-i merkūmun menzilinde akd eylediği meclis-i şer‘de mûmâ-ileyh Ali Zühdü Efendi huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup arsa-i mezkûreden keff-i yed ve bana teslîme merkūm Simon’a tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında arsa-i mezkûre gāib-i merkūmun bâ-temessük-i mütevellî bi’l-icâreteyn taht-ı tasarrufunda olup kendüsü dahi bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun ber-vech-i muharrer vekâlet müdde‘âsını inkâr edicek, müdde‘î-i merkūmdan ber-vech-i muharrer vekâlet müdde‘âsına mutâbık beyyine taleb olundukda ahrâr-ı ricâl-i Müslimînden ve medîne-i mezkûre ahâlisinden olup [64] bu esnâda Der-aliyye’ye gelen herbiri teba‘a-i müşârün-ileyhânın millet-i merkūmesinden Kerope v. Ağyazar v. Serkiz ve Agop v. Bedros v. Ohannes nâm kimesneler li-ecli’ş-şehâde meclis-i şer‘a hâzırân olup isre’l-istişhâd herbiri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı merkūmân Sepetçi Hanı’nda sâkin tüccârdan Mehmed Efendi b. Abdullah ve hân-ı mezkûr odabaşısı Sahak v. Mıgırdıç ve tüccârdan Haci Kigork v. Manuk’dan evvelâ bâ-varaka-i mestûre sırran lede’t-tezkiye makbûlü’ş-şehâde olduklarını mübeyyin müzekkiyûn-ı mezbûrûn varaka-i mezkûre zîrini ba‘de’t-temhîr alenen dahi herbiri hân-ı mezkûrda sâkin tüccârdan Markar v. Anderyas ve Vartan v. Sahak ve Lambo v. Agop ve Kahveci Kirkor v. Agop nâm kimesneler alenen bi’l-muvâcehe tezkiye olundukda şehâdetleri makbûle olduğu ihbâr olunmağın mûcebince mezkûr beş yüz seksen bir zirâ‘ arsadan keff-i yed ve müdde‘î vekîl-i merkūm Simon’a tenbîh olunmağın mâ-vaka‘a bi’t-taleb ketb olundu. Fî 5 Safer sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.