Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 142 Hüküm no: 96 Orijinal metin no: [64-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülhane Hastanesi’nde vefat eden Akif Efendi’den küçük kızları Emine ve Hatice’ye intikal eden ev hisselerinin satışına izin verilmesi İbrahim, izin Numara: 109, 22,5 guruş Mahmiye-i İstanbul’da cennet-mekân Sultan Mehmed Han -tâbe serâhû- Hazretlerinin Câmi‘-i şerîfi civârında Mimârsinan nâm-ı diğer Kumrulu Mescid mahallesi ahâlisinden olup Gülhâne Hastahânesi’nde tedâvî olunmakda iken bundan akdem vefât eden Akif Efendi b. Ali’nin sulbiye sagīre kızları Emine ve Hadice’nin min-kıbeli’l-üm ceddeleri ve tesviye-i emrlerine bâ-hüccet-i şer‘iye vasîyy-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtımatü’z-zehra Hanım bt. İbrahim m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm Hafız Ahmed Paşa Vakfı musakkafâtından mahalle-i mezkûrede Dibek sokağında vâki‘ ma‘lûmü’l-hudûd ve’l-müştemilât şehriye altmış akçe icâre-i müeccelelü yirmi sekiz numara ile murakkam bir bâb menzilin nısf hissesinden dört sehm i‘tibârıyla bir sehm hissesi müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīretân-ı mezbûretâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīretân-ı mezbûretân haklarında muzır ve gayr-ı nâfi‘ olduğundan sagīretân-ı mezbûretânın nısf hisse-i menzil-i mezkûrda olan bir sehm hisseleri bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīretân-ı mezbûretân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīretân-ı mezbûretânın nısf hisse menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan sîm mecîdiye yirmi guruş hesâbıyla bin beş yüz guruş mukābelesinde âhara ferâğa izin taleb şüd. Fî 5 Safer sene [1]301 Şühûdü’l-hâl: …? münâdîsi Mehmed Ârif Ağa b. Hamza b. Abdullah, Sıvacı esnâfından Ömer Ağa b. Mustafa b. Ali ve gayruhum.