Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 143 Hüküm no: 97 Orijinal metin no: [65-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırkkilise Muhasebecisi Mustafa Şefik Bey’in vefatıyla küçük çocukları Pertev Bey ve Zahide Hanım’a intikal eden ev hisselerinin satışına izin verilmesi Ali, izin: 1 kıt‘a Numara: 263, 500 guruş Mahmiye-i İstanbul’da Kumkapı kurbünde Sarrâc İshak mahallesinde sâkin iken bundan akdem vefât eden Kırkkilise Muhâsebecisi Mustafa Şefik Bey’in sulbî sagīr oğlu Pertev Bey ve sulbiye sagīre kızı Zahide Hanım’ın vâlideleri ve tesviye-i emrlerine bâ-hüccet-i şer‘iye vasîyy-i mansûbeleri zâtı ta‘rîf-i şer‘î ile mu‘arrefe işbu bâ‘isetü’l-kitâb Servet Hanım bt. Abdullah m. bi’l-vesâye takrîr-i kelâm ve ta‘bîr ani’l-merâm edüp Haremeyn-i Muhteremeyn Hazînesi’nden mazbût evkāfdan Dârü’s-saâde Ağası esbak merhûm el-Hâc Yusuf Ağa Vakfı musakkafâtından mahalle-i mezbûrede kâin ma‘lûmü’l-hudûd ve’l-müştemilât şehriye yetmiş beş akçe icâre-i müeccelelü bir bâb menzil müteveffâ-yı mezbûrun hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbiye mürâhıka kerîmesi Feride Hanım’a hasbe’l-âde islâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın menzil-i mezkûrda olan hisse-i şâyi‘alarını bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsılı olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan sülüsân hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla otuz dört bin guruş mukābelesinde âhara ferâğa izin taleb şüd. Fî 18 Zilhicce sene [1]300 Şühûd[ü’l-hâl]: Yaver Ağa b. Abdullah, Şehab Bey b. Mehmed Emin ve gayruhum. Derûn-ı hüccetde bast ü beyân olunduğu üzere vasîyy-i mezbûre Servet Hanım sagīrân-ı mezbûrânın menzil-i mezkûrda olan sülüsân hisse-i şâyi‘alarını bedel-i misli idiği zâhir olan lira-yı Osmânî yüz guruş hesâbıyla otuz dört bin guruş mukābelesinde Muhzır Hasan Ağa b. Abdüllatif’e ol dahi der-akab bedel-i merkūm mukābelesinde vasîyy-i mezbûra ba‘de’l-ferâğ vasîyy-i mezbûre Servet Hanım evlâdı sagīrân-ı mezbûrânın mâllarından ve li-ecli’l-idâne vasî nasb olunan Muhzır Hasan Ağa yedinden istidâne ve kabz eylediği lira-yı Osmânî yüz guruş hesâbıyla otuz dört bin guruş deyni mukābelesinde hisse-i mezkûru sagīrân-ı mezbûrâna vefâen ferâğ edeceğinden ol-vechile ferâğı icrâ ve sened-i hâkānîsi i‘tâ olunmak üzere işbu mahalle şerh verildi.