Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 144 Hüküm no: 98 Orijinal metin no: [65-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meyhaneci Panayot v. Kosta’nın ölümüyle küçük çocuklarına intikal eden bağ hisselerinin satışına izin verilmesi Nazmi, izin: 1 kıt‘a Numara: 89, 28,5 guruş Mahrûse-i Galata’ya muzâfe İstinye nâhiyesine tâbi‘ Boyacıköyü nâm mahâlde sâkin iken bundan akdem fevt olan Devlet-i Aliyye teba‘asının Rum milletinden Meyhâneci Panayot v. Kosta’nın sulbî sagīr oğulları Todori ve Panko ve Kosta ve Sinalo Kosi ve Nikoli’nin anaları ve tesviye-i emrlerine bâ-hüccet-i şer‘iye vasîyy-i mansûbeleri teba‘a ve millet-i merkūme nisvânından Hırikıle’nin babası ve tarafından husûs-ı âtîde vekîl olduğu şahs-ı merkūmeyi ârifân Tosun Ağa b. Mehmed ve Yusuf Ağa b. Bekir nâm kimesneler haberleriyle zâhir olan işbu bâ‘isü’r-rakīm teba‘a ve millet-i merkūmeden Panko v. Yani m. bi’l-vekâle takrîr-i kelâm edüp cennet-mekân Sultan Bâyezid Hân-ı Velî -tâbe serâhû- Hazretlerinin Evkāf-ı şerîfeleri müsakkafâtından karye-i mezbûrede Maslak caddesinde kâin üç numara ile murakkam ma‘lûmü’l-hudûd şehriye on akçe icâre-i müeccelelü bir kıt‘a bağ müteveffâ-yı merkūmun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı merkūmûn ile sulbiye kebîre kızları Avantiye ve Malino ve Foline’ye hasbe’l-âde ismânen intikāl edüp lâkin bağ-ı mezkûrun kürûm ve eşcârı telef ve zâyi‘ olacağı zâhir ve bedîdâr olup ol-vechile bekāsı sıgār-ı merkūmûnun haklarında muzır ve gayr-ı müfîd olduğundan mâ‘adâ sıgār-ı merkūmûnun nafaka ve kisveye dahi eşedd-i ihtiyâçları olmağla sıgār-ı merkūmûnun bağ-ı mezkûrda olan hisse-i şâyi‘alarını kibâr-ı merkūmûnun hisseleriyle ma‘an bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sıgār-ı merkūmûn haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Beşinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sıgār-ı merkūmûnun bağ-ı mezkûrda olan beş sümün hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan [66] lira-yı Osmânî yüz guruş hesâbıyla bin sekiz yüz yetmiş beş guruş mukābelesinde bâ-re’y-i mütevellî âhara ferâğa izin taleb şüd. Fî 25 Muharrem sene [1]301 Şühûdü’l-hâl: Yusuf Ağa b. Bekir, Tosun Ağa b. Mehmed ve gayruhum.